Zofate inpumkhatna atana min phuar khawmtu pawimawh tak chu Martar te an ni - Tawnluia

 MNF Senior Vice President leh Deputy Chief Minister Tawnluia chuan, “Zofate inpumkhatna atan leh inzawmkhawmna atana min phuar khawmtu pawimawh tak chu Martar te an ni,” a ti.

Aizawl Mizo Hnam Run-a Martar thlahna inkhawm nimin-a neih a hmanpuina ah MNF Sr. Vice President Tawnluia chuan Mizoram hi Zofa zawng zawngte tan Inpui-a pawm anih theih nan Martar ten an thawhhlawk hle tih sawiin, “Zofate inpumkhatna atan leh inzawmkhawmna atana min phuar khawmtu pawimawh tak chu Martar te an ni,” a ti a. “Martar te inpekna ropui zia leh hlutzia hi kan hre telh telh dawn a. An thihchhan kha kawhmawh bawl leh suahsual vang a ni lo a. Ram leh hnam tana nunna hlutak hlan an ni. Chawimawi an phu em em a ni,” aa ti bawk.

Luangmual-a Martar te Thlanmual chu ram leh hnam tana nunna lo hlan tute fel taka chhinchhiah leh ngaihhlut a tul tihna avanga din a ni tih pawh Deputy Chief Minister chuan sawiin, “Martar te Thlanmual-ah hian Hnam tana nunna hlantu zawng zawng te dah vek kan duh a. Chutih rualin, Mrtar chhungte duhthlanna ah kan dah a, inphum duhte chu kan buaipui zel a ni,” tiin Hmun hlu leh pawimawh (historical monument) anih avangin Art & Culture Department enkawl atan sawrkar in a dah thu leh tih changtlun chhoh zel tum a nih thu a sawi bawk. MNF Sr. Vice President chuan MNF chu Party dang te ang a nih loh thu leh mahni pumpui tanghma hai a, nihna um thinte tana din a ni ve lo tih sawiin, “Hnam tana thisen far tawp thlenga beitute awmna leh dinchhuah a ni,” a ti a. “MNF hi tumahin an dahhniam theih miahloh nachhan chu, Hnam Martar te thisen in a bual a ni a. Martar te hi kan Arsi lian an ni,” a ti bawk. 

Nimin-a thlahliam tak te hi L/Corporal Tlankima (MNA); Capt. Chhunhranga (MNV); Pachhunga (MNV) leh Laihnuna (MNV) te niin hmun hrang hranga a duty laia kahhlum an ni a. An chhungte ngenna anga an ruhro te hi phawrh niin Martarte Thlanmual-ah dah tur a ni.

Martar te thlahna puala inkhawm hi Ex-MNA Association-a Vice President Vanlalruata chuan kaihruaiin Ex-MNA Association President C. Zama chuan Report a pe a, MNF General Secretary Rochungnunga chuan Martar te khan hlau leh tlanchhe chungin nunna an hlan lo tih sawiin, “Hnam hmangaihna thinlung tak tak kan neih avangin Hnam sipai te khan nunna hlan kan hlau lo. Tu pawl, party emaw Kohhran emaw tana nunna hlan an nilo a, Zofa zawng zawng te tana nunna hlan an ni a. Martar te hnathawh chhunzawm turin mi zawng zawng ka sawm a ni,” a ti bawk.