Mizoram-a MRITE kalpui dan thlirletna neih a ni

Nimin khan Health Minister Dr. R. Lalthangliana hovin Momentum Routine Immunization Transformation and Equite (MRITE) program hmanga COVID Immunization kalpui dan chungchang thlirletna leh sawihona neih a ni.

United States Agency for International Development (US-AID) chuan COVID vanglai khan India rama COVID do nan sum cheng vbc. 180 chuang pein Union Health Ministry leh State a Health Department te thawhpuiin India ram hmun hrang hrangah vaccine a sem a. Momentum Routine Immunization Transformation and Equite (MRITE) project kalpuiin tar chak lo te, rualbanlo te, harsatna hrang hrang avanga vantlang mipui pawh pha lo ten COVID vaccine an dawn ve ngei theih nan tan an la a. India ram State 18-a District 241 an tuam a ni.

Mizoram -ah chuan MRITE project hi District 5-ah kalpui niin Mission Foundation Movement leh Church’s Auxiliary for Social Action (CASA) te chuan John Snow India Private Limited (JSIPL) kaltlangin MRITE program an kalpui a. MFM hian Lunglei, Mamit leh Kolasib an chang a, CASA te hian Siaha leh Lawngtlai District an chang a. He project hi February 2022 khan bultan niin tunah hian a thawh thumna a kal mek a, May 23, 2023 hian zo thei tura ngaih a ni.