Manipur buaina theih nana hma la turin ngen

Mizoram-a tlawmngai pawl hrang hrang intelkhawm, NGO Coordination Committee chuan Union Home Minister chu Manipur-a buaina a reh thuai theihna atana hma la tur leh Manipur buaina tuartute chhawmdawl hna chak taka thawk turin an ngen.

NGO Coordination Committee hruaitute hian tunkar Thawhtanni tlai khan Central YMA Vice President Lalhmachhuana hovin Union Home Minister, Amit Shah chu New Delhi-a Office-ah hmuin Manipur buaina chungchang hi an thlen a, Zohnahthlak unauten an tawrh nasat zia leh mahni Inlum pawh luah ngam lova Mizoram leh hmun hrang hranga an raltlan thu leh Mizote thinlung natzia thlenin, he buaina avanga zirna bahlah zawng zawng, a bik takin Mizoram atanga Manipur-a lehkhazir ten tha tak leh boruak muanawm tak hnuaiah an zirlai an chhunzawm thuai theih nan rang taka hmalak a ngaih thu an thlen a. Hei bakah hian he buaina a reh theih nan Manipur chhunga hnam hrang hrangte'n an pawm tlan theih tur inremna siam vat tur leh he buaina hian North East hmun hrang hrangah hlet thalo a hrin chhuah belh loh nan ngaihtuahna seng tur leh boruak thlir reng turin an ngen bawk a ni.

Union Home Minister Amit Shah chuan Manipur buaina hi a mawhphurhna a nih thu leh an enzui reng thu sawiin, tun atanga ni reilote ah boruak muanawm a thlen leh vat beisei anih thu NGO Co-ordination Committee hruaitute a hrilh a, ei leh in mamawh te pawh a luh mek zel thu a sawi bawk.

NGO Coordination Committee hruaitute hian Union Home Minister Amit Shah bakah Union Law Minister Kiren Rijiju pawh a chenna In-ah hmuin Manipur buaina irh chhuahna chhan nia lang Manipur High Court Order leh Supreme Court inrawlh dan chungchang an sawipui a, Kiren Rijiju chuan Special Status chungchang hi High Court thuneihna anih loh thu sawiin, North East MP Forum te'n boruak muanawm a thlen leh vat theih nana theihtawp an lo chhuah thu NGO Co-Ordination Committee hruaitute a hrilh bawk a ni.

Indian National Congress hruaitu Rahul Gandhi pawh heng NGO Coordination Committee hruaitute hian a chenna In ah hmu bawkin Rahul Gandhi chuan Manipur buaina chu a lo hriat tawh thu leh a tul anga a lo en zui ve reng tur thu a sawi a. NGO Co-ordination Committee hruaitute chuan Rahul Gandhi hnenah hian memorandum an thehlut bawk a ni. Heng NGO Coordination Committee hruaitute hian nimin khan Mizoram rawn thleng lehin sawrkar mi pawimawh thenkhat te an hmu nghal bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar