Ruihhlo in Mizote nasa takin min run mek a, ralpui beiha kan beih a ngai - Lalduhoma

Serchhip bialtu MLA Lalduhoma chuan Mizoram Carrom Association (MCrA) buatsaih ‘Mizoram Open Ranking Carrom Championship 2023-2024’ chu nimin khan Serchhip-ah hawngin, Ruihhlo in Mizote nasa takin min run mek thu leh ralpui beiha kan beih a ngaih thu a sawi.

Niminpiah atanga khelh tan ‘Mizoram Open Ranking Carrom Championship 2023-2024’ hawnna inkhawm nimin-a New Serchhip YMA Hall-a neih ah hian Serchhip bialtu MLA Lalduhoma chuan Ruihhlo in Mizote nasa taka min tihbuai thu leh a bikin Mizo mipate ruihhlo in nasa taka a tihbuai thu sawiin, “Kum naupangte te in nunna kan chan a, mipa aiin hmeichhia an tam tawh a, kan in balance tawh lo,” tiin hetianga kan awm zel chuan Mizo hmeichhia ten Mizo mipa pasal tur an hmu zo lo mai dawn tih a sawi a. Kan Society-ah zurui kan khawi ngampa ta lutuk chu a that loh thu leh Mizote hmel a tibal tih sawiin, ringlo mite hmaah Pathian ringtu hmel pu anga kan lanloh vangin Missionary hna kan thawhna ah min ti thuanawptu anih thu a sawi bawk.


Infiamna kawng hrang hrangah Serchhip bial chhung ah hmasawnna nasa tak a thleng tih pawh Bialtu MLA chuan sawiin, Aizawl pawn lama Mizoram pum huap Carrom intihsiakna hmasa ber Serchhip in a thleng chu lawmawm a tih thu a sawi a, Serchhip District Carrom Association pawh a dinna ala reilo nachungin nasa taka hma a sawn thu leh Mizoram pum huap inelna liantham an thleng thei ta hial chu lawmawm a tih thu a sawi a. Infiamna hrang hranga inelna neih ah Serchhip District Sports Committee hruaitute hmel hmuh tur awm thin pawh thil lawm-awm tak a nih thu a sawi bawk.

Mizoram Open Ranking Carrom Championship hawnna inkhawm Organising Committee Chairman R. Zirsangliana kaihhruaia neih ah hian MCrA Vice Chairman F. Thangvela pawhin thu a sawi bawk. He huna tarlan a nih danin Mizoram Carrom Association hi kum 1984-ah din niin an hnuaiah hian District panga (5) bakah Carrom Club 11 a awm mek a, Vawiin hian inelna zawhfel hman tum a ni.

Comments

Popular News (Last 30 Days)

LPG man bithliah thar