Mizoram-a Kohhran te inpumkhat dan tur zawngin May 19 khian ruahmanna thlirho a ni dawn

Thla thar May 19, 2023 khian Mizoram-a Kohhran hrang hrangte inpumkhat leh thawhho dan a awm em tih chungchangah inrawnkhawm a ni dawn a, he huna tel tur hian Mizoram a Kohhran hrang hrangte sawm an ni.

Presbyterian Church of India, Mizoram Synod leh Baptist Church of Mizoram ten an inkhawmpuiah ‘Kohhran hrang hrangte inpumkhatna atan hmalak ni se’ tia a rel bawhzuiin Mizoram-a Kohhran hrang hrangte thawhhona tur, Council of Churches in Mizoram din tura hmalak mek a ni a. January 24, 2023 khan Kohhran panga - Presbyterian, Baptist, Evangelical Church of Maraland (ECM), Lairam Isua Krista Baptist Kohhran (LIKBK) leh Salvation Army te kalkhawm chuan ‘Council of Churches in Mizoram’ din hi an lo rel tawh a ni.

Council of Churches in Mizoram ruangam tur duangtu, Drafting Committee dinin hmalak zel a ni a, he Committee-ah hian Rev. Lalnunzira, BCM chu Convener niin Rev. Dr. Lalhmangaiha (PCI) in a puih bakah Presbyterian Kohhran, Baptist Kohhran, ECM, LIKBK leh Salvation Army atangin aiawh an tel a. March 28 khan BCM Meeting Hall, BCM Office, Lunglei-ah thukhawmin Church Council ruangam (structure) duang felin Drafting Committee ruahmanna angin May 19, 2023-ah Kohhran hrang hrang aiawhte chuan Council ruangam hi an thlir leh anga, Salvation Army Headquarters, Aizawl-ah Meeting hi neiin ruahmanna hi Ioint Committee-in a pawm fel hunah mahni Kohhran theuh rorelna sang berah an thlen leh dawn a ni.

Council of Churches in Mizoram din a tul chhan sawiin hemi buaipuitute chuan, “Kohhran a inpumkhat loh chuan mihring hi min thendarh a, sualna chi hrang hrang do turin kan tanrual tlat loh avangin a chak thei lo a. Hei bakah Ramthar lama kan rawngbawlnaah pawh inthuah te a awm avangin a chingfeltu tur kan neih hi a ngai a. Chu mai bakah kan ram hmasawnna tur atan pawh ‘aw’ khat neiin chak zawkin kan thawk thei dawn a ni,” an ti.

Council of Churches in Mizoram chu Kohhran pakhata inzawmkhawmna tur ni lovin thawhhona leh inpumkhatna tur mai a ni tih sawi bawkin Drafting Committee member te chuan, “Mizorama Kohhran awm zawng zawng hi tel turin kan sawm vek dawn a. He pawl hian doctrine lam a buaipui dawn lo a, 'Lal Isua chhandamtu a pawm' te chu tel theih vek a ni a. Kan hmalakna hi min phurpui tak tak pawh an awmin kan hria a, beiseina sang tak kan nei a ni,” an ti a. Tuna an thawhhona chinah pawh an inlungrualin beiseina sang tak an nei tih an sawi bawk.