Inbuatsaihna thlirpui

Tun thla ni 25 atanga 27 chhunga Serchhip Sub-Hqrs. YMA Inkhawmpui vawi 7-na Chhingchhip Venghlun Branch a neih tur inbuatsaihna te Inrinni khan Inkhawmpui Programme Committee chuan a hmunah tlawhin an thlirpui.
Serchhip Sub-Hqrs. YMA Inkhawmpui vawi 7-na hi tun thla ni 25 - 27 chhung khian Chhing-chhip Venghlun Branch chuan Chhingchhip Playground-ah an thleng dawn a, hemi atana inbuatsaihna kal mek leh khawmpui atana thil tul te chu Programme Committee hian an Chairman leh Sub-Hqrs. YMA Vice President Lalrammawia hovin an thlirpui a ni. He Inkhawmpui neihna atan hian Chhingchhip Venghlun Branch YMA hian Chhingchhip Playground-ah Pandal a dung ft. 100 leh a vang ft. 48-a zauin an sa mek a, Pandal hi a hma lamah ft. 15-a zau in zauh a nih bakah Stage a dung ft. 32 leh a vang ft. 20-a zau in siam tum a ni bawk a, YMA Branch dang te pawhin an thawhpui bawk a ni.

Programme Committee Chairman Lalrammawia chuan Chhingchhip Venghlun Branch YMA te inbuatsaihna chu fakawm a tih thu sawiin, inkhawmpui neih tur atana inbuat-saihna urhsun taka kalpui a ni chu lawmawm a tih thu a sawi a. Chhingchhip Venghlun Branch YMA President PC. Vanneia chuan inbuatsaihna an kalpui mek dan te sawiin, Sub-Committee hrang hrang an siam tawh thu leh heng Sub-Committee te hian ruahmanna hrang hrang an siam tawh thu a sawi a. Palai a tam thei ang ber kal tura an beisei thu leh an inbuatsaihna ang ngeia palai a tam thei ang ber kal tura an beisei thu a sawi bawk.

He hunah hian khawmpui neih tur atana inbuatsaihna kalpui zel dan tur leh thil tul hrang hrangte an sawiho nghal a ni.