Lunglei Municipal Council inthlan hmasa berah ZPM in Seat awm zawng zawng an la vek

Lunglei Municipal Council (LMC) inthlanpui hmasa bera Vote tla te chu nimin khan chhiar niin Zoram People’s Movement (ZPM) Party chuan Seat awm zawng zawng Seat 11 chu la vekin sawrkar an siam dawn a, ZPM Party hian Vote tla zawng zawng atangin Vote 14,863 (49.81%) an hmu a ni.

Lunglei Municipal Council (LMC) din a nih hnua inthlanpui hmasa ber atana March 29-a Vote thlak te chu nimin khan Saikuti Hall-a Counting Hall siam pahnih ah chhiar a ni a, Ward No. 1 (General Ward)-ah ZPM Candidate Lalhruaitluangi Sailo chuan amah hnaih bertu MNF Candidate R. Lalhmingmawia chu vote 182 in a hneh a, Ward No. 2-ah ZPM Candidate Lalmuanpuii Renthlei chuan amah hnaih bertu MNF Candidate Laldingngheti Pautu chu vote 799-a hnehin Ward No. 3-ah ZPM Candidate Lalzuithanga chuan amah hnaih bertu MNF Candidate F. Lalsawmkima chu vote 456 in a hneh a ni. Ward No. 4-ah ZPM Candidate R. Lalramzauva chuan amah hnaih bertu Congress Candidate Joseph Lalremngheta chu vote 109-a hnehin, Ward No. 5-ah ZPM Candidate Zonunmawii chuan amah hnaih bertu MNF Candidate T. Vanlallawmi aiin vote 299 in a hmu sang a, Ward No. 6-ah ZPM Candidate R. Lalremsiama chuan amah hnaih bertu MNF Candidate LH. Lianzama chu vote 564 in a hneh thung.

Ward No. 7 ah ZPM Candidate K. Lalrinawma chuan amah hnaih bertu Congress Candidate PC. Thanzama aiin vote 761 in a hmu tam a, Ward No. 8-ah ZPM Candidate Malsawmkimi Khawlhring chuan amah hnaih bertu MNF Candidate C. Lalrindiki chu vote 904 in a hneh a, Ward No. 9-ah ZPM Candidate Zorinsanga Hmar chuan amah hnaih bertu MNF Candidate Lalngaihawma Pachuau aiin vote 578 in a hmu sang bawk a. Ward No. 10-ah ZPM Candidate Judy Lalhriatpuii chuan amah hnaih bertu MNF Candidate C. Vanlalthangi chu vote 642 in a hneh bakah Ward No. 11-ah ZPM Candidate Vanlalliana Pachuau chuan amah hnaih bertu MNF Candidate ZD. Ngurlianchhunga aiin vote 274 in a hmu sang zawk a. ZPM in Seat awm zawng zawngah hnehna changin INC, MNF leh BJP te chuan Seat lak an nei ve ta lo a ni.

Lunglei Municipal Council inthlana ah hian inthlanna neih na Ward 11-ah Vote tla zawng zawng atanga chhutin ZPM hian Vote 14,863 hmuin za zela 49.81 an hmu phak a, MNF party in Vote 8,706 hmuin za zela 29.15 hmu anga chhut a ni a, Congress Party in Vote 6,047 hmuin za zela 20.24 an hmu a, BJP in Vote 226 hmuin za zela 0.75 hmu ang an ni a, BJP Candidate zingah Vote za hmu phak awm lovin dahkham an chawi vek a ni.

Result atanga a lan danin ZPM Party hian Ward tinah Vote zaa 40 aia tam an hmu vek a, Ward panga ah Vote tla zawng zawng chanve aia tam hmuin Vote tla atanga chhuta an hmuh tam berah Ward No. II-ah za zela 59.69 an hmu a ni.

MNF President leh Chief Minister Zo-ramthanga chuan LMC hmasa ber tura inthlan tluang taka an zo thei chu lawmawm a tih thu sawiin, mipui ten an aiawh tur an duh ber an lo thlang thei chu democracy ropuizia tilangtu a ni, a ti a. Congress President Lalsawta pawhin ZPM duhsakna hlanin sawrkar tha tak siam turin duhsakna a hlan a. Congress Party chu chak turin an thochhuak leh dawn tih a sawi a. ZPM Working President K.Sapdanga pawhin Lunglei mipuite leh Mizoram mipuite chungah lawmthu sawiin, an rin phak aia tamin an tling tih a sawi a. “Mizoram ah Kalphung thar-Mipui sawrkar ding se tih mipuiten an duh takzet tawh a ni tih lantirna a ni,” a ti bawk.

Comments

Popular News (Last 30 Days)

LPG man bithliah thar