Keitum leh Khawlailung inkar-a Tuichang lei dawh thar a tha tawk tih finfiah a ni

Keitum leh Khawlailung inkar Tuichang lui-a Built-Up Steel Girder Bridge (Single Span) dawh thar chu enfiahna neih a nih hnuah Lei dawh hi a tha tawk tih hriat a ni a, Vawiin chawhnu atang hian lirtheite tan zawh theih tura hawn tum a ni.
PWD Serchhip Division-a SDO Lalrinhlua Ralte hnen atanga LENKAWL thu dawn danin he Lei dawh enfiahna, Load Test hi tun thla ni 3 atang khan neih tan a ni a, Lei hi Metric Ton 100 (kg. 1,00,000) zo tura duan niin tuna Load Test-ah hian a zawh tawk tura duan aia sang Metric Ton 120 chu Lei-ah hian dahin Lei kul dan chu enfiah hna hi thawh a ni a. Load Test-ah hian a tirah Metric Ton 120 hi dah nghal lovin tlem deuh atanga dah chho zelin a kul dan hi enfiahin chhinchhiah zel a ni a, Metric Ton 120 hi darkar 24 dah a nih hnuah a kul dan hi enfiah a ni a, phal chin ah Lei kul dan hi mm 31 vel tur a nih laiin tuna load Test an neih ah hian mm 25-26 bawr vel chauhin a kul tih PWD SDO chuan a sawi a, hemi hnu hian an Load hi ti tlem leh tial tialin a kul dan hi chhinchhiah leh zel a ni a, engmah load la lova darkar 24 dah a nih hnuah Lei kul dan hian a tira a awm anga ngai awh leh tur a nih laiin tuna enfiahna ah hian darkar 12 velah Lei hian a dinhmun ngai a awh leh hman tih a sawi a. Hei vang hian Lei dawh hi a tha tawka ngaih a nih thu a sawi a. Vawiin chawhma lamah rawng hnawih hna zofelin chawhnu lamah dan pangngaia hawn leh hman tum a ni.


Keitum leh Khawlailung inkara Tuichang Lei dawh hna hi Sadguru Engineers & Allied Services Pvt. Ltd. ten thawkin Double lane, 7.5mtrs a zau leh 68mtrs a thui a ni a, Project Cost hi cheng vbc. 8.25 niin kum 2016 December thla khan thawh tan a ni a, a tirah RCC tura ruahman ni mah se Lei ban phunna turah harsatna a awm avangin Built-Up Steel Girder Bridge (Single Span) in dawh tura tih a ni leh ta zawk a. Hetianga hna thawh dan tur tih danglam a nih avang hian a tira zawh hun tur, kum 2018 lo tih tawh pawh sawn leh niin, November, 2019 khan hna hi tan leh a nih hnuah March 31, 2020-a zo tura tih an ni a. Amaherawh chu hri leng leh chhan dang dang avangin a hun takah zawh theih a ni ta lo thung a ni.

He Lei dawh thar Load Test neih tawp ni, nimin khan Hrangturzo West Block MNYF te chu a hmunah kalin Load Test result hi an ngaichang a, he hunah hian an President Mikael Lalduatpuia chuan thangkhat lian dawn he Lei dawh hna thawh tawh, Hrangturzo bialtu MLA leh Home Minister Minister Lalchamliana leh MNF sawrkar hotute leh PWD thawktute thahnem ngaihna a zara tuna hawn mai theih tur dawh zawh a ni ta chu lawmawm an tih thu a sawi a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar