April 15 thleng sawrkar ngaihchan leh tum

North Vanlaiphai Joint Action Committee ten nimin atanga an khuaa sawrkar Pisa kai tur leh School kal tur dan an tum chu sawrkar lam nen inbiakna an neih avangin tun thla ni 15 thleng ngaihchan leh nise an ti.
North Vanlaiphai atanga Block Agriculture Officer (BAO) Office sawn-chhuah duh lohna lantira North Vanlaiphai JAC te hmalakna kal mekah hian Inrinni khan JAC aiawhte leh sawrkar lam aiawhte chuan Aizawl ah inbiakna an nei a, Health Minister Dr. R. Lalthangliana chuan JAC te hi lo dawngsawngin an thilphut te tun dinhmuna tihfel mai theih a nih loh avangin inbiak chhunzawm zel nise an ti a. Hetianga sawrkar nen inbiakna kallai a awm avang leh sawrkar aiawh lamin an ngen angin, North Vanlaiphai JAC chuan an thilphut nawr nana nimin atanga an khuaa sawrkar Pisa kai tur leh Zirna In kai turte dan an tum chu thulh rih a ni a, sawrkar hmalakna hi April 15, 2023 thleng ngaihchan phawt nise an ti a ni.