Ground Water Irrigation Project hmasa ber hawng

Mizoram-a buh leh thlai chawm nana leihnuai tuiverh hmalakna (Ground Water Irrigation Project) hmasa ber ni turin Tuipui (Mual-buhvum) Ground Water Irrigation Project (GWIP) chu nimin khan Irrigation & Water Resources Department Minister C. Lalrinsanga chuan a hawng.

Champhai leilet Mualbuhvum hmuna he Project hawnna ah hian IWRD Minister C. Lalrinsanga chuan Mizoram-ah Ground Water Irrigation Project kalpui dan turte uluk taka zirchian hmasak thin a nih thu sawiin, Leihnuai tui chim chin (Ground Water Table) North East-ah a that avangin hmalakna awmchhunte a hlawhtling deuh zel chu lawmawm a tih thu a sawi bawk.

India hi khawvel puma leihnuai tui tling (groundwater) hmang nasa ber niin Groundwater hman tamna ber chu Irrigation Sector a ni a, Mizoram-ah chuan Irrigation atan Groundwater hman a la ni meuh lova, Groundwater Irrigation Project 13 chu Mizoram hmun hrang hrangah a vawi khat nan kalpui mek niin a senso zaa 90 (90%) chu Sawrkar laipui Department of Water Resources RD&GD, Ministry of Jal Shakti-in a tum a, za zela 10 hi State-in a tum thung a ni. Heng project 13 thawh nan hian cheng nuai 1604.89 ruahman a ni a, sum ruahman zawng zawng hi sanction kim a la ni chiah lo nain, project 4 thawh zawh tawh a ni.

He Project atana hian cheng nuai 99.10 ruahman niin Tubewell 15 verh a ni a, heng tubewell te hi Solar pump pali (4) leh electric pump 11 te hmanga tui lakchhuah a ni. Heng tubewell 15 zinga paruk hi Department Drill Rig hmanga verh a ni a, a dang 9 te hi Private Driller-te verh tir niin minute khatah tui litre 15-20 vel a pump chhuak thei a chhungkaw 52 ten chhawr thei tura beisei an ni.