BRO hotu in Governor kawm

Border Roads Organisation (BRO)-a Director General Lt. Gen. Rajeev Chaudhry VSM chuan niminpiah tlai khan Raj Bhavan-ah Governor Hari Babu Kambhampati hmuin Mizoram a Project Pushpak ten ramri hrula kawngpui siam hna an thawh chungchang leh thil pawi-mawh dang te a sawipui a. Governor chuan BRO hotulu ber, DGBR leh a hnuaia Project Pushpak, Mizoram a hnathawk te chungah lawmthu sawiin, Mizoram chuan BRO te kawng laih leh enkawl an chhawr tangkai a, an hmalakna te an thlawp chhunzawm tih a hrilh a. Project Pushpak hnuaiah hnathawh mek te chu a chhawrtu tur mipui ten an mamawhna a san tawh em avangin a hun taka thawh zawh a nih theih nan Project Pushpak hotute chu theihtawp chhuah turin a chah bawk a ni.

Lt. Gen. Rajeev Chaudhry chuan April 2, 2023 khan Champhai – Hnahlan – Khuang-phah Road Project Pushpak in a thawh mek chu a endik tih Governor hnenah hian sawiin, Mizoram chhunga Project Pushpak hnathawh mek a an hmasawnna leh thlenchin te a sawi bakah Mizoram-a Project thar an la khawih leh tur chungchangte pawh a sawipui bawk.