Aizawl sahuan-ah Sakei nu leh pa dah belh a ni

Aizawl Zoological Park-ah Sakei pahnih, a nu leh a pa (Royal Bengal Tiger) dah belh a ni a, mipuite en theih tura phochhuah hun tur erawh hriat theih a la ni rih lova, Sakei dah belh te hi inthlahpung thei tura beisei an ni.

Thudawn danin February 14, 2022-ah khan Guwahati Zoo atangin keipui pakhat lak luh a lo ni tawh a, Keipui dang pahnih chu Nandankanan Zoological Park, Bhubaneswar atanga lak leh niin, March 31 khan Aizawl Sahuan phurh thlen a ni.

Sakei la tur hian Aizawl Sahuan Range Officer Immanuela leh VO Dr. Rosangzuali Chhakchhuak hovin Sahuana thawktu mi paruk an kal a, Aizawl atangin March 21 zingah chhuakin March 24 tlai ah an thleng a. Engkim peihfel a nih hnu-ah March 27 tlai-ah Nandankanan Zoological Park chhuahsanin March 31 tlaiah Aizawl sahuan phurh thlen a ni a. Tun tuma Sakei lak tharte hi a nu leh pa niin, a pa hi Kundan niin April 20, 2016-a piang a ni a, kg 180 vela rit a ni a. A nu hi Adyasha niin August 9, 2016-a piang a ni a, a la tê deuh hlek thung. Sakei lak tharte hi hun engemaw chen chu dahhran an ni rih dawn a, hemi vang hian mipui en theih tura phochhuah hun tur hriat theih a la ni rih lo.