3rd IR-in Assam chhuahsanin Thingkah an luah ta

Kum 2010 January thla atanga Counter Insurgency Operation-a Assam-a awm Mizoram 3rd IR Bn. chuan kum 13 hnuah an awmna hmun an chhuahsan ta a, an hmun thar tur, Thingkah (Lawngtlai District) an luahlut nghal a ni.

Thudawn danin 3rd IR Bn. Assam chhuahsan te hian an hmun thar tur an pan nghal zel a, Assam-a an awm tirhin rambuai (disturbed area) 34 awmin an rawn chhuahsan dawn hnaih ah chuan pariat chauh a awm tawh a, hei vang hian Union Home Ministry ngaihdanah a ralmuang thawkhat tawh nia ngaih niin, 3rd IR Bn. Service mamawhna a tlahniam tawh nia ngaih a ni.

3rd IR-te hi Counter Insurgency Operation thoin Chhatisgarh-ah kum hnih an lo awm tawh bawk a, tuna Assam an chhuahsan chu anmahni (3rd IR) lam pawhin lunglenthlak an ti a, Kohhran-a hma an lakna hrang hrang te, an inkhawmna biak In khar a ngai ta te chu an hriatreng tawh tur a ni tih an sawi a. Mangaldai-a an inkhawmna/biak In thutthleng leh Pulpit-te chu Mizoram-ah an hawn a, an hmun thar turah an hmang chhunzawm dawn nia thudawn a ni bawk.

3rd IR hian Assam-a awm hrehawm an ti lo tih thudawnna chuan sawiin, “Kan discipline a tha a, kan phunchiar lo a, duty tha takin kan kalpui a, kan awmna apiangah tualchhung mite lakah hmingchhiatna kan nei lo. Assam miten ui takin min thlah liam a. Lawm deuh, hmai uang ve deuhin kan rawn chhuahsan niin kan hria,” an ti bawk.