Mizoram Assembly House-a rorelna tluang taka kalpui thin Speaker in chhuanawm a tih thu a sawi

Mizoram Legislative Assembly Speaker Lalrinliana Sailo chuan State thenkhat leh Parliament House-ah te an tih theih loh a nih laia Mizoram Assembly House-ah rorelna tluang taka an kalpui thin chu chhuanawm a tih thu sawiin, Member te thahnem ngaihna chuan rah tha ala chhuah a rin thu a sawi bawk.

February 7, 2023 atanga neih Mizoram Legislative Assembly thutkhawm chu nizan hmasa khan Speaker Lalrinliana Sailo chuan tiamchin awm lovin a titawp ta a, Speaker chuan Session neih chhunga tih tur an duan hrang hrangte tluang taka an zo thei chu lawmawm a tih thu sawiin, hei hi State thenkhat leh Parliament House-ah te an tih theih loh a nih laia rorelna tluang taka an kalpui thin chu chhuanawm a tih thu a sawi a, ram leh mipui tana thahnem ngaihna avanga inhnial bawrh bawrh chang awm thin mah se, pawn lama khakna leh inhuatzuina awm lo-a inrem taka an awm leh mai thin te chu a lawmawm a, member zawng zawngte thahnem ngai taka ram leh hnam tana an tha leh zung, rilru leh ngaihtuahna te hmanga an thawhho hian rah duhawm tak a chhuah ngei a beisei tih a sawi bawk a ni.

Tun tum,Budget Session hi Mizoram Legislative Assembly 8-na Term kal meka thutkhawm vawi 11-na niin Feb. 7-a thutkhawm tan ni hian Larsap Haribabu Khambampati-a’n House-ah thu a sawi a, tun tum Session-ah hian zawhna 1,529 lutin, hei hi Mizoram Legislative Assembly pian hnua zawhna luh tam ber tum a ni a. House chhunga chhan chi zawhna, Starred Question 1,160 lut zinga 1,152 chu pawm niin 8 hnawl a ni a, hnawl a nih chhan hi a sei lutuk vang a ni a, danah a tawi tur tih a nih vang a nih thu Speaker chuan a sawi. Starred Question an dawn zinga zawhna 260 chu List of Businees-ah dah niin, House-ah zawhna 64 chhan hman a ni a, chhan hman loh 195 a awm a, zawhna hnuhkir 3 awmin, House chhunga hnuhkir 1 a awm a, chhanna dawn loh 59 a awm a ni. Ziaka chhan chi zawhna, Un-Starred Question 369 dawn zinga zawhna 365 pawm niin, 4 hnawl a ni a. Starred Question atanga Un-Starres Question-a leh 693 a awm a, chhanna dawn loh 43 a awm a ni.

Session neih chhung khan House-ah Report 4 pharhin, Paper 41 Lay a ni a. Dan dinglai siamthatna tur Bill 6 lut te pass vek a ni a, Aizawl North-II bialtu MLA, Dr. Vanlalthlana'n Private Member Bill a put luh, The Mizoram Land Revenue (Amendment) Bill, 2023 chu sawiho a nih hnuah Select Committe ngaihtuah tura dah a ni.

Private Member Resolution 86 dawn te chu pawm vek niin, Aizawl West-I bialtu MLA Zothantluanga putluh “Mizoram Sawr-kar kal meka Sports Infrastructure din kawnga hmasawnna nasa tak kan neih hi lawmawm kan ti,” tih leh Aizawl South-II bialtu MLA, Lalchhuanthanga'n “Kawngpui tha leh Building tha kan neih theih nan tun aia uluk takin hnathawh ni rawh se,” tih a putluh chu sawiho a nih hnuah lungrual taka pawm a ni a, Hachhek bialtu MLA Lalrindika Ralte Private Member Resolution lutluh erawh sawiho a nih hnuah “Kan ram thenawm Myanmar leh Bangladesh atanga sa himna zawnga kan unau raltlan-a lo kalte Mizoram Sawrkar leh Mizoram mipuiten tha taka kan lo dawng-sawng hi a lawmawm kan ti a, a tul ang zela lo tuamhlawm chhun-zawmin, an awmna tur leh an mamawhte ngaihtuah zel ni se kan ti,” ti-a siam danglam a nih hnuah pawm a ni bawk.

Hei bakah hian tun tum thutkhawm neih ah hian Home Minister, Lalchamliana'n Uniform Civil Code (UCC) duh lohna Official Resolution a putluh chu House-in lungrual takin a pawm bawk. 

Comments

Popular News (Last 30 Days)

Vawiin-ah HSSLC Exam result

LPG man bithliah thar