Kum 2024 March thla ah 2-Lane NH kawngpui hman theih tura siam zawh hman a ngai - Governor

Governor Hari Babu Kambhampati chuan Mizoram-a National Highway 2-Lane siam mekah hna thawh tur atanga zaa 60 lai thawh zawh a ni ta chu lawmawm a tih thu sawiin, “Kum 2024 March thla a lo thlen chuan 2-Lane NH kawngpui te hi hman theih tura siam zawh hman a ngai a ni,” a ti.

Governor Hari Babu Kambhampati hian nimin khan Aizawl-a Raj Bhavan-ah NHIDCL-a Executive Director Virender Jokhar leh a thawhpuite kawmin Mizoram hmun hrang hranga NHIDCL in Project hrang hrang - kawngpui siam hna leh hna dang a thawh mek te thlirho a ni a, he hunah hian Governor Hari Babu Kambhampati chuan Aizawl to Vairengte kawngpui 4-Lane a zauh tur chu la thawh theih rih loh mah se National Highway 2-Lane a siam mek te 60% lai thawh zawh a ni ta chu lawmawm a tih thu a sawi a. NHIDCL te chuan an hnathawhna ah harsatna an neih te chu chinfel zung zung dan an dap thiam a ngai tih sawiin, “Kum 2024 March thla a lo thlen chuan 2-Lane NH kawngpui te hi hman theih tura siam zawh hman a ngai a ni,” a ti. Mizoram tan kawngpui tha leh Rel kawng te hi a pawimawh takzet a, heng hmasawnna ruhrel liantham leh pawimawh tak te hi siam zawh a nih hun chuan Mizoram economy hmelhmang nasa takin a danglam dawn tih a sawi bawk.

Mizoram-a National Highway awm mekah hian NHIDCL hian enkawl leh siam tur a nei thui ber a. Tunah hian National Highway siam tur an neih KM 888 a thuiah KM 248 an siam zo tawh a, KM 560 siam la hmabakin KM 80 a thui pawh siam belh an tum mek bawk a ni.

He huna tarlan danin JICA sum hmangin NE Road Network Connectivity Improvement project Phase-1 (Aizawl to Tuipang), Phase-2 (4 numbers of By-passes on Aizawl to Tuipang) leh MoRT&H sum hmangin Bharatmala Pariyojana hnuaiah Seling-Champhai, Lunglei -Tlabung, Tuivai-Keifang leh Vairengte- Sairang siam hna thawh mek a ni a. Heng Project hnuaiah hian kawngpui 2-Lane chu KM 732.10-a thui cheng vbc. 14944.94 sengin siam mek a ni. NHIDCL chuan 4-Lane Road Aizawl- Vairengte leh 2-Lane Road Keifang -Tuivai Poad Package-II te pawh an la thawk dawn a, he hna thawhna tur chin a kawngpui thui zawng chu km 103.11 niin cheng vbc. 1389 ruahman a ni.