Hero MotoCorp-in Mizoram Police hnenah Motorcycle/Bike 100 an hlan

Hero MotoCorp chuan an CSR Scheme, 'Hero We Care' atangin Mizoram Police hnena Motorcycle/Bike 100 an pe a, heng te hi nimin khan Aizawl-a 1st MAP Ground-ah a khuhhawnna neih a ni.

Nimin a Motorcycle/Bike an pek khuhhawnna hun hi Home Minister Lalchamliana chuan hmanpuiin Hero MotoCorp ten phal taka Mizoram Police te hman tur Bike 100 lai an pe chu lawmawm a tih thu a sawi a. Sawrkarin sum harsatna avangin thil tam tak tih theih a nih loh thu leh mi dang puihna avangte in thil tam tak an dawn thin thu sawiin, DGP Devesh Chandra Srivatsva kaihhruaina hnuaia hetianga an mamawh tak mai an nei ta chu lawmawm a tih thu a sawi a, Police hotute chungah pawh lawmthu sawiin, tuna Bike 100 hi cheng nuai 79 man a nih thu leh hmeichhia leh naupangte an harsatnaa puih nana hman tur a nih thu a sawi bawk.

Mizoram Police chu lirthei leh Housing Quarters lamah an pachhe em em tih pawh Home Minister chuan sawiin, “Mawhphurhna ka lak tirh atangin hemi kawngah hian theihtawp kan chhuah a. Project te kan han siam a, kan beisei ang hi kan la nei thei chiah rih lo,” a ti a. “Tunah hian motor 730 vel Police kan nei a, zaa 30 vel chu hman hleih theih tawh loh a ni a. Hmun hrang hranga Police Station te mamawh kan pe mai thei lo hi hrehawm ka ti a. Heng bike 100 lai hian kan chetvelna ah hian awlsamna nasa tak min thlen ka beisei,” tiin Hero MotoCorp te chu Mizoram mipuite pawhin duhsak let ve turin a ngen bawk.

Hero MotoCorp te hnen atanga dawn Motorcycle 100 te hi Mizoram Police aiawhin John Neihlaia, IPS, IGP (Hq) chuan dawngin Mizoram Police Unit tin hnenah an mamawh dan ang zela semrual sa chu pekchhuah nghal a ni a, Home Minister chuan a vailiam nghal a ni. Heng bike te hi hmeichhe himna kawnga hnathawhnana hman tura tih niin Hero MotoCorp hian CSR hmangin thil dang tam tak Mizoram State tan an lo ni tawh bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar