Chapchar Kut hi Mizote min suihkhawmtu leh kan inpumkhatna lo ni zel rawh se - Chief Minister

Chief Minister Zoramthanga chuan Chapchar Kut chu Zofate Mizoram chhung leh pawn, khawvel hmun tin a awm te nen min suihkhawmtu, kan inpumkhatna lo ni zel se a duh thu sawiin, harsatna karah inpumkhatna chhawm nung zel turin Zofate chu a sawm bawk.

Nimin-a Aizawl Sipai Lammual-a 'Zofate Inpumkhatna' tih thupui hmanga Chapchar Kut hman Kut Pa ni-a a hmanpuina ah Chief Minister Zoramthanga chuan COVID-19 hripui leng avanga kum hnih chhung chu pangngai taka Kût hman theih anih loh hnuah kumin ah ropui taka mipui thahnem tak nen ahuhova Kut ho theih a ni ta chu lawmawm a tih thu sawiin, Mipui Kût chibai a buk a. He Kut kan lawmnaah hian kan thenawm ram Myanmar ami te, India ram hmun hrang hrang, Bangladesh leh hmun dang danga kan unau te tel ve tura sawm an nih thu sawiin, sawrkar pawh theihtawpin a inbuatsaih thu a sawi a. Thenawm ram buai avanga hmun harsa zawka awm te pawh Kut min hmanpui tura sawm niin min tel pui thei tura a rin thu te, Kut thupui angin Zofate Mizoram chhung leh pawn, khawvel hmun tin a awm te nen min suihkhawmtu, kan inpumkhatna lo ni zel se tiin, harsatna karah inpumkhatna chhawm nung zel turin Zofate chu a sawm a ni.

Chief Minister chuan kumin Chapchar Kût chu Mizoram-ah G20 hnuaia Meeting pakhat B20 Meeting Aizawl a nghah nen a hun innang chiahin, ram hrang hrang atanga Meeting a tel tura lo kalte'n Mizo Kutpui an rawn chhim ve theih phah chu lawmawm a tih thu a sawi bawk.

Aizawl-a Chapchar Kut hmanna ah hian Assembly Speaker Lalrinliana Sailo chuan Kut Thlengtu niin Kut hmang tura kalkhawmte lawmna thu sawiin, hnam ziarang chawilar zel thiam a, pi pute lo nun dan leh tih thin danah a thalo lai paih a, a tha lai chhawmnung zel tur kan nih thu a sawi a. Kût hman danah pawh hlim taka lawmin, ruihhlo tello a inngeih tlang tak zela hmang turin kalkhawmte a sawm a ni.

He hunah hian Central YMA President R. Lalngheta pawhin thu sawiin, Mizo Hnam lam leh zai hrang hrang bakah rimawi tum leh Mizo infiamna te entir a ni a, a hun hnihna ah zai leh lam hrang hrang entir a ni bawk.

Chapchar Kut Pual hian Aizawl Vanapa Hall-ah I&PR Department hmalakna in Photography leh Painting Exhibition buatsaih a ni a, Aijal Club Park-ah Flower Show buatsaih a ni bawk. Lammual-ah hian ei leh in tur leh thawmhnaw leh adangte zawrhna Stall engemawzat hawn a ni bawk.