Tuikum bialtu MLA in Hualtu-ah Tournament hawng

Tuikum bialtu MLA leh Social Welfare & Tribal Affairs Minister Er. Lalrinawma chuan nimin khan a bial chhunga Hualtu khua ah ‘Laichinga Memorial Football Tournament’ chu khuallian niin a hawng.
    Hualtu Khelmual-a he Tournament hawnna ah hian Er. Lalrinawma chuan mihringte hian hmasawnna nei turin inrintawkna leh inthunun theihna kan mamawh thin tih sawiin, inringtawk thei turin inbuatsaihna tha kan neih pawh a tul thu a sawi a. Football khel tura kalkhawm infiammite pawhin Football-ah hian eizawn theihna, sum leh pai tam tak lakluh theihna remchang a awm tih an hriat angin, chutiang tithei khawpa an inbuatsaih chuan anmahni mai ni lovin ram leh khawtlang tan pawh a hlawk a ni, a ti.

Kan thalai theihna nei ten infiamna lama eizawnna leh hmasawnna an hmuh chhoh zel theih nan Mizoram sawrkar chuan Sports Infrastructures a din nasa hle tih pawh Er. Lalrinawma chuan sawiin, “Sports Policy tha tak a duang bawk a, theihtawp chhuaha beitute tan chuan kawng a inhawng zau hle a ni tih i hria ang u,” tiin infiammi kalkhawmte a chah a. Ruihtheih thil leh mipat hmeichhiatna a fihlim tur leh an hriselna te ngai pawimawh reng turin a chah bawk.

Tournament hawnna inkhawm hi Hualtu GSA President K. Lalmuanchhana chuan kaihruaiin Laichhinga tu leh fate aiawhin Lalrammuana chuan thu a sawi a. He Tournament-ah hian khualkhua leh khawtual atangin Team 25 an tel a ni.

Er. Lalrinawma hian Hualtu Middle School hlui sawnna tur Hriangtlang hmun pawh a en nghal a, School hlui hi thiah a nih hunah Hualtu khelmual hi laihzauh nghal tura ruahman a ni.