Serchhip-ah National Deworming Day hmangin Rulhut hlo pek beihpui thlak leh a ni
.jpeg)
National Deworming Day pual hian Serchhip-ah chuan nimin khan P&E Veng Anganwadi Centre No-I ah hun hman niin Serchhip District Hospital-a Paediatrician Dr. C. Lalrinzama chuan he ni hman chhan leh Rulhut hlo ei a pawimawhna te a sawi a. Rulhut chu thilnung ten an ei apiang ringchhawng a nung ve a ni tih sawiin, hei vang hian mihring emaw, ramsa emaw ah lo chuan an dam thei lo tih a sawi a, hetianga kan thil ei apiang ring ve a nih avangin chawtha leh kan taksa tana thil tha kan ei te pawh kan taksa in a thatpui tur angin a thatpui thei thin lo tih sawiin, hei vang hian naupang leh tleirawl zingah taksa lama harsatna nei an tam avangin India sawrkar chuan National Deworming Day hi kum 2015 atang khan hman a nih thu a sawi bawk.
He ni ah hian Rulhut hlo, Albendazole chu kum 1 leh kum 19 inkar te hnenah pek thin niin he damdawi hi thla ruk (6) chhung hna thawk thei a nih avangin kumtin February thla leh August thla ah damdawi te hi ei thin a nih thu Dr. Zama chuan a sawi a. He damdawi ei te atanga report an dawn ah mihring taksa tana nghawng tha lo a neih hriat anih loh thu a sawi bawk. Rulhut hlo kan ei bakah hian a hnu zelah Rulhut kan pai zel lohna turin kan thil ei dawnah kan kut kan tihfai uluk a tul thu te, kan ei leh in bakah tui in tur te a thianghlim a tul thu te a sawi bawk a ni.
National Deworming Day puala Inkhawm tawi neih hi Serchhip CMO Office-a DRCHO Dr. Samuel-a chuan kaihruaiin Serchhip CMO Dr. Lalzawmi leh Serchhip-a Women and Child Development Department-a DPO Vanlalhruaii te pawhin an hmanpui a ni.
National Deworming Day-ah hian Serchhip District chhunga Anganwadi Centre leh zirna In hrang hranga kum khat leh 19 inkar te hnenah Rulhut hlo hi pek a ni a, heta pek loh te hi Veng tin leh khaw tina ASHA ten an In ah kalchilhin an pe leh dawn a, tun tumah hian Serchhip District chhungah mi 21,577 te pek tura ruahman niin tun thla ni 17 khian pek fel vek hman tura ruahman a ni.