Serchhip-ah Khawpui Fai inelna lawmman lak lawmna leh infuihtharna hun hman a ni
Urban Development & Poverty Alleviation Department buatsaiha he hun hmanna ah hian District Bawrhsap Nazuk Kumar IAS chuan kum kalta a khawpui fai inelnaa pathumna kan dawn theih nana tha thawhtu zawng zawngte chungah lawmthu a sawi a. Mizote hian kan thinlungah faina hi kan tuh nghetin kan nunpui tawh nia a hriat thin thu sawiin, “Kan hmunhma te a faiin a thianghlim tlang hle tawh a ni. Amaherawh chu hmasawnna tur nei tawh lo kan ni lo thung a, faina kawnga thapui han thawhna tur kan la nei a ni tih hriaa kan thawhzui zela, kan fate thinlungah pawh nghet taka kan tuh a tul hle a ni,” a ti a. Tun tuma lawmman pathumna kan lak hian nasa lehzuala tan kan lak a tulzia min hriattir se a duh thu a sawi bawk. Bawrhsap chuan Serchhip khawpui bawlhhlawh sawngbawlna tur Chhiahtlang daiah buatsaih mek a nih thu sawiin, a puitlin hunah chuan kan bawlhhlawhte fel fai taka senghawiin sawngbawl theih a nih tawh dawn thu a sawi a. Faina inelna lo awm leh turah pakhatna ni thei ngei tura theihtawp chhuah tlang turin Serchhip mipuite a sawm bawk.
Serchhip District Urban Development Officer (DUDO) Lalrinsanga Hnamte kaihhruai he hunah hian Addl. DC Lalmuansanga Ralte pawhin Serchhip District chu kan vanneih thu leh kawng hrang hrang ah ‘tha thang’ a nih thu sawiin, hei hi Pathian malsawmna a nih thu a sawi a, tun tuma Khawpui Fai inelna a lawmman pathumna kan lak theih nana tha thawhtute zawng zawng chungah lawmthu sawiin, Faina hi tute emaw hmalakna tur bik ah emaw dah mai tur a nih loh thu leh kan awmna leh kan Veng theuh ah Faina atana kan thawh tlan hian khawpui fai kan lo ni mai thei dawn tih sawiin, tanrual chu chakna a nih thu a sawi bawk a ni.
Nimin-a he hun hmanna hian Serchhip Joint VC Chairman B. Vanlalngura chuan Faina atana hriat tur pawimawh leh inelna atana thil tul leh pawimawh hrang hrangte a sawi a. He hunah hian Mizoram Khawpui Fai inelna lawmman atanga lei Bawlhhlawh bawm chu Town chhunga VC tin te hnenah sem nghal a ni bawk.