Serchhip-ah Mega Mock Drill hlawhtling takin nei

Mizoram District khawpui hrang hrangah nimin khan a rualin Lirnghing in chhiatna nasa tak a thlen avanga chhanchhuahna hna thawh dan tihchhinna, Earthquake Mock Drill neih niin Serchhip-ah pawh he Mock Drill hi neih a ni.
He Mock Drill atan hian zing dar 10:00-ah Siren ti ri-in hmun panga- Govt. Higher Secondary School Serchhip, District Education Officer (DEO) Office AOC Veng, Bazar Building, Hmar Veng leh District Hospital-ah te chhiatna thleng anga tihchhin a ni a, District Disaster Management Plan in a kawhhmuh angin hmalak zui nghal a ni bawk.

District Disaster Management Plan in a tarlan angin chhiatna a thlen thu hi hriattir an nih veleh Incidence Response System hnuaia mawhphurtu Officer (Responsible Officer) leh Incident Commander ten District Emergency Operation Centre (DEOC, DC Office) an pan nghal a, DEOC hi tihnun nghal niin anni hian chhan-chhuaktu pawl leh chhiatna thlenna hmun hrang hranga chhanchhuahna atana an mamawhte lam khawmin an buatsaih zui nghal a. Chhanchhuaktu bungrua leh hmanraw lian mamawhte chu Staging Area (Leisekawt Field)-ah dahkhawmin, Staging Area Manager chuan chhanchhuahna hnathawhna tur hmun panga ah te hian chhanchhuaktute hi a tirchhuak a, a tul ang zelin hliam te chu District Hospital-ah phurh thlen an ni a, mitthi te pawh Police ten dan angin an endik bawk.

Ruahman lawk angin heng hmun hrang hrangah te hian Mock Drill hi hlawhtling taka neih a ni a, hemi hnu hian State Level De-briefing neihzui leh niin he hunah hian Mock Drill an neih atanga thil tul leh pawimawh ruahman zui ngai te pawh tarlan a ni bawk.