PM-KISAN a inziaklut te enfiahna thlirho a ni

Nimin khan Lawngtlai-ah District Level Grievances Redressal and Monitoring Committee under PM-KISAN chu an Chairman leh Bawrhsap Amol Srivastava hovin an thukhawm.

    Sawrkar Laipui ruahmannaa kut hnathawktute tanpuina Pradhan Mantri Kisan Samman Nidhi (PM-KISAN) hi kum 2019 atang khan Mizoram-ah kalpui a ni a. He Scheme hnuaia inziaklut, kut hnathawktu, ram nei ngeite chu kumtin Bank kaltlangin tanpuina Rs. 6,000/- pek thin an ni a. Lawngtlai District chhunga PM-KISAN hnuaia inziaklutte an in-a kalchilha an dinhmun enfiahna (re-verification) chu thlirho niin pawm a nih hnuah State Level Committee-a thehluh tura tih a ni.

January ni 31, 2023 thleng khan Lawngtlai District chhung Block pali-a khaw 176 atangin PM-KISAN hnuaia inziaklut beneficiary 77,895 an awm tawh a, PM-KISAN guideline anga felfai thlap beneficiary 24,306 awmin, mahni-a ram nei lo, lonei mi (jhummian) 6,293 an awm bawk a; jhummian-te hi beneficiary-a telh thei turin dil mek a ni.

Hemi huang hniha tel lo beneficiary 47,296 awm thungin, heng zingah hian chhungkaw khat atanga mi pakhat aia tam inziaklut mi 4,933; mahni khua atang ni lova inziaklut mi 39,570; sawrkar hnathawk leh pensioner inziak lut mi 1,720, mitthi tawh 879 leh anmahni chhui chhuah theih loh mi 194 an awm a ni.