P&E Veng-ah kangmei chhuak

Nizan hmasa khan Serchhip P&E Veng-a Lalrinpuii Sailo te In ah kangmei chhuakin van-duaina nasa zawk a thlen hmain Fire Department leh mi tlawmngai ten an thelhmit thei a ni.
Thudawn danin nizan hmasa dar 12:40 vel khan Serchhip P&E Veng Mini Park thlang-a Lalrinpuii Sailo te In ah kangmei hi chhuak a, kangmei chhuah chhan tak hi hriat ni lo mah se kangmei chhuahna lai hi In nen inzawm-a nampuk, Kudam atan leh mei chhemna atana Tap an bunna hmun a nih avangin hemi atanga intan hi nia rin a ni a. In neitute chuan zan dar 11:00 velah pawh helai hmunah hian an kal thu sawiin, mei chhemna ah engmah mut leh kang awm a awm an hriat loh thu an sawi a. Amaherawh chu Tap an bunna hi a hnuailam thingphek a nih avangin hemi atanga intan nia rin a ni.

Kangmei chhuak hriat a nih veleh hian mi tlawmngai ten a thelh hna thawk nghalin Fire Department te pawh hriattir nghal an ni a. Anni pawh rang taka a hmun thleng nghalin kangmei nasa zawk a thlen hmain an thelh thei a ni.

Kangmei chhuak avang hian an Kudam awmna lai hi a kan chhiat vek bakah a chhunga awm eirawngbawlna gas bur 4 chu chhiain pakhat a puak a, hei bakah hian a chhunga Bel leh Dekchi bakah bungraw dang an dah te pawh a kangchhe vek a, nimin khan thenawm khawveng ten kangmei in a tihchhiat senghawi hna leh Kudam sak that hna hi an thawh sak a ni.