Naktuk atangin Mizoram Legislative Assembly Budget Session neih a ni dawn

Mizoram Legislative Assembly 8-na thutkhawm vawi 11-na chu naktuk, February ni 7, 2023 hian tan a ni dawn a, Feb. 28 thleng a awh ang.

Tun tum Assembly Budget Session tanni ah hian tih dàn pângngai in Lârsap-in House-ah thu a sawi anga, Lârsap thusawi chunga lawmthu sawina Motion putluh a nih hnuah thutkhawm tin nghal a ni ang. A tuk February ni 8-ah thutkhawm hmasa leh tun tum thutkhawm inkara Member hlui thi te sunna leh Deputy Speaker thlanna neih a ni anga, Feb. 9-ah sawrkar thil pawimawh te ngaihtuahin Feb. 10-ah Private Member Resolution te sawiho a ni leh ang. Feb. 11 leh 12 te chawlh a nih hnu Feb. 13-ah Chief Minister leh Finance changtu Zoramthanga'n kum 2023 leh 2024 inkar sawrkar kum-a Mizoram sum ruahman (budget) chu House-ah a pharh dawn a, hemi rual hian sawrkar kum kallai atana sum indaihlohna phuhrukna tur (Supplementary Demands for Grants for the year 2022-2023) chu House-ah a pharh bawk ang.

Assembly ni 15 chhunga thutkhawm turah hian sawrkar dan siam tur pahnih - The Indian Stamp (Mizoram Amendment) Bill, 2022 leh The Mizoram (Restriction on use of Transferred Lands) (Amendment) Bill, 2022 te chu House ah pharh turin a lut tawh a. Assembly House chhunga chhan chi zawhna (starred question) 1,018 lut tawhin ziaka chhan tur (unstarred question) 299 a lut tawh a, House dawhkan-a dah tur lehkha pawimawh 29 lutin Private Resolution 69 leh Private Member Bill pakhat a lut tawh bawk a ni.

Budget pharh tuk, February ni 14 hian sawrkar kum kallai atana sum indaihlohna phuhrukna tur dil belhna (Supplementary Demands) chu sawihova pawm nghal tura chhawp-chhuah a ni ang a. February ni 16 leh ni 21 hian Budget a tlangpuia sawihona hun hmangin Feb. 17-a Private Member te atanga thu lut ngaihtuah leh a ni anga. Minister-te’n an department enkawl theuhva sum ruahman te chu February ni 22 leh 23 bakah ni 27 leh 28-ah te House-ah pharhin sawihona neih a ni dawn a ni.