Hnathawh tur a hun takah thawh zawh dan kawng hmuhchhuah a ngai - Governor

Governor Hari Babu Kambhampati chuan hmasawnna ruhrel dintute hian mawhphurhna pawimawh tak an nei hi an hriatchiana, an hnathawh turte a hun takah thawh zawh dan kawng an hmuhchhuah a ngai tih a sawi.

    Governor Hari Babu Kambhampati hian nimin khan Raj Bhavan-ah Project Pushpak hnuaia ramri hrul kawngpui enkawlna leh kawngpui thar siam hna thawktu Border Roads Organisation (BRO) hotute chu kawmin Mizoram hmun kilkhawr zawkah te inkalpawhna tha zawk a awm theih nan Project Pushpak hnuaiah BRO ten hna ropui tak an thawk tih a sawi a. Heng kawngpui te hi a chhawr tangkaitu chu mipui an nih rualin ram venhimna kawnga thawktu sipai te tan pawh a tangkai dawn hle tih sawiin, Mizoram-ah hnathawh hun chhung a rei lo tih hre chunga chak taka hna an thawh thin avangin BRO te chu an fakawm thu a sawi a ni.

Governor chuan Mizoram-ah hnathawh hunchhung a reilo tih chu tlang hriat a nih thu leh he hnathawh hunchhung rei lo leh harsatna awm thei zawng zawngte hi Project siam dawnah sawifiaha bilh tel vek a nih thu a sawi a. Heng zawng zawng chhut lawk sa vek hian Project thawh zawh hun tur hi siam a ni thin tih sawiin, “Mizoram-ah chuan Project te kum 2 atanga kum 3 thawh zawh tura siam te chu kum 5, kum 6 leh a aia reiah te zawh a ni fo thin a. Hei hian project thar awm tur a lo dan bakah mipui ten an chhawr tangkai hun tur aia tlaiah an chhawr phah fo a. Thil fello tak a ni,” a ti bawk.

Governor chuan BRO te chu kawngpui siam hna an thawh kawngah tunlai thiamna thar te hman tangkai tum turin a chah a. Sarang leh Plastic bawlhlawh te pawh tangkai taka kawngsiamna hmanrua a hman dan dap ve turin a fuih bawk a. BRO hnathawh leh project te pawh Mizoram mipuiin an hriat theih nan BRO hotute chu tlangzarh kawngah tan la turin Governor hian a fuih bawk a ni.