Mizoram-ah Gorkha 7,686 an awm

Home Department-in Gorkha chhiarpui an buatsaihah kum 2021 thleng khan Mizoram-ah Gorkha 7,686 an awm a, Mizoram puma mihring awm zat atanga chhutin Gorkha awm zat hi za zelah bial point 59 (0.59%) a ni.

Tunhnaia Council of Ministers thukhawmin an pawm tak Gorkha Chhiarpui report hi Home Department aiawhin Mizoram University mithiamte’n an buaipui a, kum 20 kalta, 2001-ah khan Mizoram-ah hian Gorkha 4,453 an awm a, kum 20 chhungin 3,233-in an pung a. Kum sawm dana an punna hi za zela 36.3 a ni. Gorkha chhiarpui-ah hian January ni 26, 1950 hma lama Mizorama lo cheng tawh leh an thlahte chauh telh an ni.

Gorkha-te hi Aizawl District-ah awm tam berin mi 5,318 an awm a, Kolasib District-ah 1,353 awm bawkin an awm tlemna ber Champhai District-ah chuan mi 5 an awm a, Mamit District-ah 76 an awm bawk.

Mizoram-a awm Gorkha engemawzat hi British-in Mizote tukdawl tura beihpui an rawn thlak ‘Vailen’ an tih mai-ah pawh rawn telte kha an niin hriat a ni a. Kum 1835-a din, Cachar Levy an tih thin, tuna Assam Rifles ni ta-ah hian Gorkha tam tak an lut a, Mizorama awm thenkhat chu an inbengbel zui bawk a ni. Mizo zingah harsatna nei lovin kum tam tak an awm tawh a, MNF te’n zalenna an sual lai pawh khan Gorkha engemawzat chu an rammu ve nghe nghe a ni.