Mimal thil-a inchhawr tihtawp duh thu thlen

Mizoram Pradesh Youth Congress Committee (MPYCC) chuan Police te an hna (Duty) bak mimal thil-a inchhawr thin chu tihtawp nise an duh thu an sawi.

    Congress Thalaite chuan Mizoram Police Department hnuaiah an hotuten an naute an hna pangngai (official duty) piah lamah mimal hnaa inchhawr a hluar leh tan ta tih tunhnaiah report an dawn thu leh hetianga mimal thila in chhawr hi tha lo an tih thu leh tihtawp a nih ngei theih nan nimin khan Home Minister Lalchamliana hnenah ziaka ngenna an thlen thu an sawi a, Director General of Police, Mizoram Devesh Chandra Srivastva IPS hnenah a copy an pek thu an sawi bawk. MPYCC chuan Congress Party-in Sawrkarna a chan chhung khan, khatih laia Home Minister R. Lalzirliana ho khan mimal hna thawk tura inchhawr hi khap a lo ni tawh thin tih sawiin, dan leh thupek kenkawh kawngah MNF Sawrkar a inthlahdah em avang hian mimal hna thawk tura Police te inchhawr hi tunhnaiah hriat tur a lo awm leh ta chu pawi an ti takzet tih an sawi bawk.