Latest News

Meidum khua a Natural Gas hmuh la lachhuak lo

Oil and Natural Gas Corporation (ONGC) chuan Kolasib District Meidum khuaah Jan. ni 5, 2012-ah Natural Gas hmuchhuakin tun thlengin lakchhuah hna thawh a la ni lo.

    Parliament Session neih mekah Mizoram Rajya Sabha MP K.Vanlalvena zawhna te nimin khan chhangin Union Minister of Petroleum and Natural Gas Rameswar Teli chuan Kolasib District Meidum khuaah Jan. 5, 2012-ah ONGC ten Natural Gas an hmuchhuak tih hi sawiin, amaherawh chu tun thlengin lakchhuah hna thawh a la ni lo tih a sawi a. Zawhna dang chhangin Sihhmui ah Oil Depot siamna atana ram an en chu a hmun a tha tawk tih Indian Oil Corporation Ltd. (IOCL) ten report an pek tawh thu pawh sawiin, Oil Depot siam hna chu Mizoram sawrkarin Land Acquisition an tihfel hma leh hma lovah a innghat a ni, a ti.

Union Minister of Jal Shakti Bishweswar Tudu chuan Rajya Sabha MP K. Vanlalvena zawhna chhangin Mizoram thingtlang khaw hrang hrangah Van ruahtui khawl khawmna atana tuikhuah leh Dil siam hna thawhna atan PMKSY Scheme hnuaiah a thawh khatna ah kum 2015 atanga 2021 chhungin cheng vbc. 282.16 pek a ni tawh tih a sawi a. Rain Water Harvesting thawh hnihna atan cheng vbc. 28.44 chu 2022 chhungin Mizoram sawrkar hnenah pek a ni tawh bawk tih a sawi a ni. Tun tum Parliament Session neih mekah hian zawhna tenau deuh te tiamin Minister hrang hrang 20 te hnenah K. Vanlalvena hian zawhna 63 a thehlut a ni.

Comments

Popular News (Last 30 Days)