Serchhip District chhunga Health and Wellness Officer (HWO) te tan nimin khan an hnathawhna kawnga pawimawh chi hrang hrang zirhona neih a ni.
He zirhona Serchhip CMO Conference Hall-a neih hi Serchhip District Surveillance Officer (DSO) Dr. Lalngaihawmi Chhangte chuan kaihruaiin, Training neih a nih chhan te a sawi a, training a tel tur hian Serchhip District chhunga Health & Wellness Officer mi 22 te koh an nih thu leh an thil zir te chu tangkai taka an hman zui tur a nih avangin ngai pawimawh turin a chah bawk.
He Training hi Jhpiego bultuma neih niin Jhpiego-a PO, H. Priscilla Sema chuan Oxygen Concentrator hman dan leh enkawl dan hrang hrangte leh Oxygen Concentrator hnathawh dan te he huna kalkhawmte hi a zirtir a. Chawhnu lamah Sub-Centre hrang hrang ten tlang hrileng leh natna hluar thut ah te ni tin-a Report an pek dan, Integrated Health Information Platform (IHIP) chungchangah C. Lalmalsawmi DDM (IDSP) Serchhip chuan zirtirna pein IHIP an kalpui meka harsatna an neih leh a sutkian dan tur sawihona neih a ni a. Family Planning chungchanga hmalakna, Mission Parivar Vikas (MPV) chungchangah Deborah Vanlalchhuangi DPM Serchhip chuan zirtirna pein chhang zing lutuka nau piang tur venna atan he hmalakna hnuaiah hian nikum December thla khan District chhunga Sub-Centre tinah Condom Box te siam a lo ni tawh bawk.
Hei bakah hian naupang te Pneumonia laka an him theihna tura kum 2019 atanga kalpui, Social Awareness and Actions to Neutralize Pneumonia Successfully (SAANS) chungchangah Dr. Lalngaihawmi Chhangte DIO chuan zirtirna a pe bawk a ni.
.jpeg)
Comments
Post a Comment