Tourism Minister in cheng nuai 900 chuang senga sak Thenzawl Auditorium a hawng

Cheng nuai 900 chuang senga sak Thenzawl-a Auditorium chu nimin khan Tourism Minister Robert Romawia Royte chuan a hawng a, Auditorium hawn a ni ta chu 'Sawrkar hmasate bul lo tan tawh hmasawnna hna thate chu kan chhunzawm zel dawn' tia an sawi thin hlawhtlinna pakhat a nih thu a sawi a ni.

Thenzawl Auditorium hawnna ah hian Tourism Minister Robert Romawia Royte chuan Thenzawl-a Auditorium tha tak hawn theiha a awm leh hawn a ni ta chu lawmawm a tih thu sawiin, Auditorium zahpuiawm loh tak a nih thu a sawi a. A hawnna hi neih tum tawh thin mah se harsatna engemaw avanga sawn thin a nih hnuah hawn a ni ta chu lawmawm a tih thu a sawi a. Sawrkar hmasa a Serchhip bialtu MLA Lal Thanhawla'n ngaihtuahna sang tak nen bul tana hma an lo la chu lawmawm a tih thu leh zawhfel hman ni lo mah se Chief Minister Zoramthanga kaihhruai MNF sawrkar chuan mipuite hnena an in zawrhna angin hna tha leh chhunzawm tlak chu phur taka an chhunzawm thu leh Golf Course te pawh chhunzawma hawn a nih tawh thu a sawi a. Chutihrual erawh chuan chhunzawm tlak hlawl loh erawh a awm thu a sawi bawk.

Tourism Department chu Department te takte an nih thu leh thawktu pawh tlemte, DDO pawh pakhat chauh nei an ni chungin theihtawp chhuahin an tang tlang tih Tourism Minister chuan a sawi a. COVID-19 hri len lai, hna tam tak thawh theih loh a nih lai pawhin Dan chi hrang hrang te siamin Online hmanga hna an thawh thu leh tunah hian tangkai taka hman mek a nih tawh thu a sawi a. “Mumal takin Responsible Tourism Policy, Rules leh Acts te kan nei ta a, hemi behchhan hian hmasawnna hnathawhna turte pawh Central atangin kan hmu chho zel a ni,” a ti a. “Thenzawl pawh a hmunhma ten a zirin a rem em em a, thil tha tak tak dang pawh a la rawn kal zel dawn a, a bul kan la tan laih laih chauh zawk a ni. Tunah hian External Aided Fund hi cheng vbc. 1000 zet a thuphungin kan hmu tawh a, a hmanna tur kan duang chho mek a, Tourism hmasawnna tur tha tak tak kan la sa chho mup mup dawn a ni”, a ti bawk.

Tourism Department Director Saitluanga kaihhruai he hunah hian Khual zahawm Tourism Development Board Vice Chairman TC. Pachhunga pawhin Auditorium thar hawn tak chu ropui a tih thu sawiin, tunhma lamin kawngpui a tlang that loh avangin Thenzawl chu tlawhpawh hlawh vak lo leh chawlhna atan pawha hman ngai meuh loh a ni tih a sawi a. Amaherawh chu MNF sawrkar in Aizawl leh Lunglei inkar kawngpui a laih hnuah kawngpui pawimawh takin paltlangin tunah chuan khawpui hmasawn leh changkang tak a nih tawh thu a sawi a. Pathian malsawmna a nih rualin sawrkar tha kan din vang a nih thu a sawi a. He huna kalkhawm te chu thing leh mau, nungcha leh tuihna humhalh kawngah theihtawp chhuah turin a chah bawk.

He hunah hian PWD Project Division-II a Sr. Executive Engineer Er. H. Lalnghing-lova chuan Technical Report pein Thenzawl Auditorium hi thawh hnih a thawh a ni a. April 25, 2016 khan a building sak hna hi cheng nuai 499.99 senga thawh tan ni tawhin March 30, 2019 khan sak zawh a ni a, hemi hnuaiah hian a hmunhma cheibawl te, a building sak te leh Tui dahkhawlna siam hna bakah hna thenkhat thawh a ni a. A chhungah hian mipui 758 thut theihna tur thutna dah nghal a ni a. Heng hna te thawh anih hnu hian a chhung leh a chhehvel cheithat hna chu cheng nuai 417.56 senga thawh leh a ni a, Sound System pawh tha tak dahin Chowkidar quarters leh Storeroom pawh sak a ni bawk a. Heng bakah hian 125kV Generator dah tur a ni bawk.