2019-2020 Mizoram Per Capita Income Rs. 1,86,133/-

Kum 2019-20 a Mizoram mipui pakhat zelin chawhruala a sum lakluh (Per Capita Income) chu Rs. 1,86,133 a ni.

    Mizoram sawrkar Directorate of Economics & Statistics-a State Domestic Product Unit-in Mizoram in kum khat chhunga a thawhchhuah tlangpui chung-chang leh a kaihnawih an tihchhuah atanga a lan danin kum 2019-20 a Mizoram mipui pakhat zelin chawhruala a sum lakluh (Per Capita Income) chu Rs. 1,86,133 niin kan ram ei leh bar (Economy) thanna/punna rate chu 11.93% (at Constant Price) a ni bawk.

Kum khat chhunga Mizoram State thar-chhuah/siam chhuah zawng zawng hlut zawng sum hmanga chantirin a hlutna zat chu State Domestic Product (SDP) tih niin SDP hi hlawm lian deuh pathum-ah then a ni a, Agriculture & Allied Sector, Industry Sector leh Service Sector tih niin Agriculture & Allied Sector hian kum 2019-20 khan za zelah 25.73 (25.73%) a thawkchhuak a, Industry Sector-in za zelah 24.82 (24.82%) thawkchhuak bawkin SDP atanga za zela 49.45 (49.45%) chu Services Sector thawhchhuah a ni bawk.

Kum 2020-21 atan Provisional Estimate an neih mek thu pawh an thuchhuah ah hian tarlangin, kum 2021-22 ah Advance Estimate siamin a hnu lam kum phei chu System of National Accounts (SNA) guidelines angin Projection siam a nih thu an tarlang bawk a. Final Estimates ni lo chu data thar an neih ang zelin a danglam reng tih pawh tarlangin, India ram pumpui State hrang hrang Final Estimates chhuah hun hi a inang vek thu leh SDP chu ram/ram bung khat (State/UT) thanna teh nana huap kim leh tha ber la niin, khawvel ah he chhutna hi inang tlanga hman a nih thu an tarlang bawk.