Latest News

International Year of Millet, 2023 lawmna bul tan

Mizoram Sawrkar Agriculture Department buatsaihin ‘International Year of Millet, 2023’ lawmna bul tanna hun chu nimin khan Aijal Club-ah Agriculture Minister C. Lalrinsanga hovin neih a ni.

    Nimin a he hun hmanna ah hian Agriculture Minister C. Lalrinsanga chuan Sawrkar Laipuiin Buhtun (Millet) thatzia leh tangkaizia hriain UNO lamah rawtna a thlen angin kumin 2023 hi International Year of Millet ah puan a lo ni ta tih sawiin, Buhtun-ah hian mihring taksa tana chaw tha tam tak, mihring hriselna atana pawimawh chi hrang hrang a inphum a, natna do theihna kawngah pawh nasa takin a pui thei tih a sawi a, heng a thatna tam tak piah lamah ram economy nghawng pha hial khawpa sum lakluhna pawimawh a ni, a ti.

Agriculture Minister chuan India Sawrkarin kumtin cheng vbc. tam tak lakluh nan Buhtun hi a hmang tih sawiin, Mizoram pawhin kan chhawr tangkai ve thei a ni, a ti a. Buhtun hi Mizoram tan thil thar a ni lo a, pi leh pute hun lai atanga chin tan tawh a ni a, ram tan ei leh bara intodelhna kawng pawimawh tak a nih avangin Mizoram pawhin hemi kawngah ke kan pen tha a tih thu a sawi bawk.

India Sawrkar rawtna angin kum 2023 hi United Nations, Food and Agricultural Organization (FAO) chuan International Year of Millets-ah a puang a. Chumi in a tum ber chu zau zawk leh uar zawka Millet thatna puanzar leh uar zawka chin a ni. Hemi bawhzui nan hian Mizoram-ah pawh nasa taka hmalak tum chhoh mek a ni a. Millet hian lei chhia leh hmun ro a ngam em em a, natna leh eichhetu lian tham a neih loh avangin enkawl a nuam a, a thar hma em em bawk a ni. Millets hian mihring taksa in a mamawh chaw tha tam tak a pai a, kan buh ei thin anga Cholestorel chhia leh Calorie a pai tam ve loh avangin Zunthlum leh Thisensang nei tan chaw tha tak a ni bawk. Millets hi chi hrang hrang 12 a awm a. Chung zingah chuan Mizo in kan hriat lar chu Faisa, Puakzo leh Buhtun a ni.

Comments

Popular News (Last 30 Days)