G20 Business Meeting atana hmalakna thlirho

Kumin March ni 2-a Aizawl khawpui a ‘G20 Business Meeting’ lo awm tur inpuahchahna atana din, Core Team chu Zirtawpni chawhnu khan Home Commissioner leh  Nodal Officer for Mizoram for Overall Coordination of G20 H. Lalengmawia hovin an thukhawm.

    He thutkhawm ah hian H. Lalengmawia chuan Mizoram Sawrkar chuan he G20 inkhawm hi hlawhtling leh hneh taka thlen a duh thu sawiin, inkhawm naran mai ni lovin Mizoram leh Mizote hmel lanna bakah India ram hmel lanna pawh a tel dawn a, chuvangin kiltin atangin inbuatsaihna leh inpuahchahna te a tha tawk em tiin ngaihtuah a ngai reng dawn a ni, a ti a. “Sub-Committee hrang hrang 10 dinte chuan an ruahmanna te a felfai em, a tha tawk em tiin a khat tawkin an thlirho a ngai dawn a, chu mai bakah thawhhona tha tak an neih a ngai dawn a ni,” a ti bawk. 

He thutkhawmah hian Sub-Committee 9 te chuan ruahmanna an lo duan chhinte an tarlang a, heng te hi zau taka sawiho niin hemi atana sum mamawh te pawh sawiho a ni bawk. G20 Chief Coordinator, Foreign Secretary hlui Harsh Vardhan Shringla chu January ni 27-ah Aizawl-ah hemi chungchang Mizoram Sawrkar hotute nen sawiho turin lo zin tura beisei a ni.

Tarlan tawh thin angin December ni 1, 2022 khan India chuan G20 Presidency kum khat atan a chelh tan a. India Presidency chhung hian ramchhung khawpui hrang hrang 50-ah inkhawm leh Event chi hrang hrang 200 aia tam buatsaih a ni dawn a. Hengte hi Sawrkar laipui chuan ramchhung khawpui lian bakah hmarchhak state khawpui ah te a nghat dawn a ni.