Union Minister in Zoram Mega Food Park tlawhin hmasawnna awmlo a hriatthiam loh thu a sawi

Food Processing Industries leh Jal Shakti changtu Union Minister of State Prahlad Singh Patel chuan nimin khan Mizoram rawn thlengin Khamrang khua a Mega Food Park chu a tlawh nghal a, he Mega Food Park-a hmasawnna awm lo chu a hrethiam lo tih a sawi.

Food Processing Industries leh Jal Shakti changtu Union Minister of State Prahlad Singh Patel hian nimin khan Mizoram rawn thlengin Commerce & Industrial Board Vice Chairman K. Laldawngliana leh sawkar hotu ten Lengpui Airport-ah an lo hmuak a. Hemi hnu hian Ministry of Food Processing Industries hnuaia Mega Food Park Scheme hmanga din, Zoram Mega Food Park, Khamrang chu a hmunah tlawhin, hma an lak tawhna leh harsatna an tawh mek te a enfiah nghal a ni.

Hemi hnu nimin tlai khan Aizawl-a BJP Pisa-ah Party mi leh sa te a kawm hnuah chanchinbumite kawmin nimin-a a tlawh Khamrang-a Mega Food Park siam nan cheng vbc. 75 ruahman atangin Sawrkar laipui chuan cheng vbc. 44.60 a pe tih sawiin, pawisa dang chu thil dang atanga hmuh tur a ni, a ti a. Kum 2020 July thlaa hawn tawh Zoram Mega Food Park, tun thlenga hmang tangkaitu Company an la awm loh chhan a zawhna chu hnathawktute chuan, khawl hnathawh theih dan a sang lutuk a, Mizoram chhunga thlai tharchhuahte chu thawh tham a awm si loh avangin Company ten khawl an la hmang tangkai thei lo niin an sawi a. Tunah hian thil lian tham lutuk lo chu siamchhuah a nih thu an sawi bawk a. Minister chuan Mega Food Park a tlawh chu a hmun tur leh thildang engkim peih ni tawh mahse a hnathawh dan tur angin a awmlo tih sawiin, hmasawnna a hmu lo tih a sawi a, hmanrua awm vek tawh hmasawnna awm lo chu a hriatthiam loh thu a sawi bawk.

Minister chuan Jal Shakti hnuaiah Mizo-ram chhunga tui herhhaw na chu kum 2024 ah zawh vek tura ruahman a ni tih sawiin, Mizoram Sawrkarin an report danin kum 2022-ah za zela 70.6 chu zawh a nih thu leh kum 2023-ah tui herh hawna neih vek theih an beisei tih a sawi a. Tui lakna atan tuizem tha tak leh thir tuidawt hman tur a ni tih sawiin, Mizoram-a plastic tuidawt hman a ni chu a diklo tih a sawi a, Sawrkar hotute a sawipui dawn tih a sawi bawk.

Ruahman ang chuan Union Minister hian Vawiin hian Lawngtlai District a tlawh ve leh dawn a ni.

Comments

Popular posts from this blog