Thentlang kum 50-na lawm

Serchhip District chhunga Thentlang khua chuan nimin khan an khaw kum 50 tlin lawmna neiin bialtu MLA leh Assembly Deputy Speaker Er. Lalrinawma chuan khuallian niin a hmanpui a ni.
Thentlang Golden Jubilee lungphun chu bialtu MLA hian hawngin Darpawngi Hall-ah Jubilee lawmna neih zui a ni a, he hunah hian bialtu MLA chuan Thentlang khua in kum 50 lawm thei khawpa malsawmna a dawng chu lawmawm a tih thu sawiin, khaw lungrual leh hlun tak ni zui zel turin duhsakna a hlan a. Mizote hi mahni khawbu zawl leh hmun hlui ngaina tak hnam kan nih thu leh, thenawm khawveng kan inpui tawn nasain kan intlawh pawh nasain mahni pian leh murna khua ngaina tak vek kan ni tih a sawi a. Hei vang hian Aizawl leh khawpui dangah pawh khawchhuak Welfare tam tak kan neih phah thu a sawi a, heng Welfare hian thil tha ti tura kan insuihkhawm nan nasa taka hnaa an thawh thu a sawi a. Mahni khua kan ngainatna hian a tihhmasawn zel duhna pawh min pe deuh deuh se, sawrkarin hmasawnna a tana kut a rawn thlak tinrengah a neitu rilru pua, vawnhim ngai chite tha taka vawnghima, lo thawhpui a tulna chi ah te leh kan lo tih ve theih kawng tinrengah khawtlang tana lo thawk ve zel turin a ngen bawk a ni.

Jubilee lawmna inkhawm hi VCP Lal-siamliana’n kaihruaiin VC Secretary Lalsangzuala chuan an khaw chanchin a sawi a, Khual zahawm leh Thentlang khawchhuak MCS hmasa ber Lalhmachhuana chuan Golden Jubilee Souvenir a tlangzarh bawk. Thentlang khua hi kum 1972-a din kha niin tunah hian In 164 awm mekin mihring 821 an cheng mek a. Zirna In Primary School atanga High School thleng awmin Sub-Centre an nei bawk a ni.