Serchhip-ah World AIDS Day 2022 hmangin zirlaite tan lemziak intihsiakna neih a ni
Serchhip-a World AIDS Day hmanna hi Serchhip-a High School leh Middle School zirlai naupangte tana World AIDS Day pual lemziak intihsiakna neia bul tan niin zirlai naupang 240 ten intihsiakna an nei a. High School naupang ten ‘Inchiuna inhmantawm thatlohzia’ tih leh Middle School zirlaite naupang ten ‘Engtinnge Drugs kan pumpelh theih ang’ tih thupui hmangin lem inziahsiakna hi neih a ni a. Hemi hnu hian he Ni puala inkhawm neih zui niin he hun hmanpuitu District Bawrhsap Nazuk Kumar IAS chuan World AIDS Day hmang tura kalkhawmte chu chibai bukin, HIV/AIDS chu enge a nih kan hre tlang viau tawh nain a invenna lamah nasa zawka tan kan lak a tul hle tih a sawi a. Mizoram-ah he natna kan inkaichhawnna bul ber te chu invenna tel lova mipat hmeichhiatna hmansual (Sex) leh Drugs inchiuna (Drugs Abuse) atang te a ni tih sawiin, hei hian kan nun kan uluk a tulzia a tichiang hle tih a sawi a. “Thalaiten kan nun vawng uluk ila, he natna laka himna kawngte nasa takin i sawi darh ang u,” a ti a ni.
Bawrhsap chuan Mizoram-ah HIV/AIDS vei kan tam tawh avangin he natna hi hri dang, mipui nawlpui kara a leng ang thovin a leng darh ve tawhah ngaih a ni hial tawh tih sawiin, kan dinhmun hi a tha lo tih a sawi a. He natna tuar mekte pawhin tha taka damdawi an lak a pawimawh thu sawiin, “Kan inenkawl that chuan dam tha takin hun rei tak kan awm thei tih kan hrereng dawn nia,” a ti a. Inrinhlelhna neite phei chuan hreh hauh lova in test vat a tul thu sawiin, chu chu mahni leh midangte tan a nih thu a sawi a. Serchhip District a ART Centre leh ICTC ten hna an thawk thjat thu pawh sawiin, “A mamawhtu apiangten inthlahrung hauh lovin i hmang tangkai ang u,” a ti bawk.
He hun hi Dr. Lalnunhlima Khiangte, District AIDS Control Officer chuan kaihruaiin HIV/AIDS nihphung te, a hlauhawm dan leh inkaichhawn awlsam dan hrang hrangte bakah HIV/AIDS laka in ven dan kawng hrang hrang ngaihthlak leh thlirho a ni a. Serchhip CMO Dr. Lalzawmi pawhin he hunah hian eng natna hrik pawh nise umbo tur chuan inven hmasak a pawimawh tih sawiin, HIV/AIDS natna hrik umbo tur pawh hian inven a pawimawh thu a sawi a, a tihdamna damdawi ala awmloh avangin inven a pawimah thu a sawi a, zirlaite chu kan nghahfak an ni tih sawiin, a tihdamna, a invenna vaccine ala awmloh avangin a inven theihna awmchhun nun fimkhur a ni tih hre thara HIV/AIDS laka inveng fimkhur turin a chah a ni.
World AIDS Day puala Lemziak intihsiakna-ah hian Middle School Section-ah Marry Hellen Lalruatfeli (All Saint School) chu pakhatna niin Vanlalthakimi (Little Flower Convent School) chu pahnihna leh Malsawmpeki (Little Flower Convent School) chu pathumna an ni a. High School Section-ah Jacob Lalpekhlua (PES) chu pakhatna niin Linda Zonunsangi (Govt. H/S Serchhip) chu pahnihna leh Vanlalpekkima (Govt. JM H/S) chu pathumna an ni a, lawmman atan pawisafai hlan niin Bawrhsap in a hlan a ni.
World AIDS Day, 2022-ah hian thupui atan ‘Equalize’ tih chu hman a ni a, HIV/AIDS darh zel tur thapui thawha do a tul takzet tih hmuntin kiltina tlangaupui a tulzia sawina auhla a ni.
Comments
Post a Comment