Ram leh mipui tan ngawrh taka tha thlah lova ruihhlo do hna kan thawhho a ngai - Chief Minister

State Level Narcotics Coordination Centre (NCORD) thutkhawm chu nimin khan Chief Minister Zoramthanga hovin neih a ni a, he hunah hian Chief Minister chuan Mizoram chu ramdang dep a awm, ruihhlo tawlhna kawng a nih avangin ram leh mipui tan ngawrh taka tha thlah lova a do hna kan thawhho a ngai a ni, a ti.

CM Office Conference Hall-a State Level Narcotics Coordination Centre (NCORD) thutkhawm ah hian Chief Minister chuan ruihhlo dona kawngah harsatna hrang hrang awm mahse mawhphurtu Department leh pawl ten kan zawn theuha hna awm chu theihtawp chhuahin thahnemngai taka hma kan lak hmasak phawt a tul a ni, a ti a. Ruihhlo chungchang nasa zawka inhrilhhriatna kalpui pawimawh a tih thu sawiin, a bik takin zirna In-ah Awareness kalpui chhunzawm zel ni se a ti a. Ruihhlo tawlh do kawngah pawh Intelligence System tha zawk neiin, sawrkar leh tlawmngai pawl leh mipui thawhhona tha tak nen tha thlah lova hmalakttul a tih thu a sawi bawk.

He thutkhawm ah hian Narcotics Control Bureau, Mizoram Police, Excise & Narcotics Department, Social Welfare & Tribal Affairs Department leh Assam Rifles te’n an hmalakna theuh presentation an pe a. Chief Secretary Dr. Renu Sharma chuan State Level NCORD)hna tlangpui leh a pawimawhna tarlangin, State chhunga ruihhlo dinhmun enfiah te, ruihhlo do leh ruihhlo ngaite enkawlna kawnga thawkte thuamthat te a tel thu a sawi a. Mizoram DGP Devesh Chandra Srivastva pawhin Member tinte chungah hmalakna tha tak an neih ho theih zel avangin lawmthu a sawi a. Ruihhlo do hna chu Mizoram Police in a ngaihpawimawh ber zing ami a nih thu sawiin, kumin chhunga ruihhlo an man leh Awareness pek kawnga an hmalakna hrang hrangte a tarlang bawk a ni.

Social Welfare and Tribal Development Department chuan zirlai naupang zinga Drug Survey an neih chungchang leh hmalakna dangte tarlangin, India rama State-te zinga naupang Drug Survey nei hmasa pawl an nih thu an sawi a, zirna In 122-a zirlai 10,773 survey zingah vaihlo, zu, Cannabis, Inhalants, Heroin, Opioids, Sedatives leh Opium vawi khat tal ti tawh leh survey an lak laia a hma thla thum chhunga lo hmang tawh (an vawikhatna ni lo) te zawh a nih thu tarlan a ni a. Middle School, High School leh Higher Secondary School naupangte an zingah survey hi kalpui niin Middle School naupang zingah pawh ruihhlo thatlohzia hi inhrilhhriat nasat a tul hle thu an sawi a ni.