Pawl 10 Science leh Mathematics Zirlaibu Mizo tawng-a ziak tlangzarh a ni

Mizoram Board of School Education (MBSE) buatsaih Pawl 10 Science leh Mathematics Zirlaibu Mizo tawng-a ziak chu nimin khan School Education Minister Lalchhandama Ralte chuan a tlangzarh.

MBSE Conference Hall-a he lehkhabu tlangzarhna hunah hian Education Minister chuan beiseina sang tak leh nghakhlel taka thlir Class 10 Science leh Mathematics zirlaibu Mizo tawng-a a chhuak chu lawmawm a tih thu a sawi a. Mizo zirlai tam takin Science leh Mathematics an huphurh thin bik nachhan chu tawng an hriatthiam tawk loh vang niin, a nihna bulthum an man tawk loh vang a ni, a ti a. Mizo tawng-a chhawpchhuah a ni chuan zirlai tam tak ten heng Subject 2-te chu an ngam sawt anga, tlangnel sawtin, an tui phah dawn a ni, a ti. Minister chuan hmasawnna hnukpui chu Science leh Mathematics-ah a innghat lian em em tih pawh sawiin, ram changkang leh lehkhathiam ram ten an ngaih pawihmawh tak subject a nih thu a sawi a, Mizo tawng zirlaibu chu naupangte hriatthiamna tak tak neih tir tu a ni ngei dawn tih a sawi a. Mizo version chiah chhuak thei rih mahse Mizo leh English Bu (Bilingual Textbook) chu nakum Academic Session-ah a chhuah hman a nih tur thu a sawi bawk.

National Education Policy, 2020 chuan 'Multilingualism' (tawng chi hrang hrang thiam) ngai pawimawhin Zirlai naupang ten Science leh Mathematics subjects-te anmahni tawng (mother tongue) ngeia an zir hian hriatthiamna tak tak an pawchhuak zawk tura ngaih a ni. Hei hi sawrkar lama hotute pawhin tha tiin, an ngai pawimawh hle a. Hemi bawhzui hian Mizoram Board of School Education chuan Bilingual Sub-Committee on Secondary Science and Mathematics chu May 5, 2022 khan a din a. Mizoram-a Science leh Mathematics zirtirtu thiam leh tha tak tak te he Sub-Committee member atan hian ruat an ni a. Hma pawh chak taka lak nghal niin, MBSE Officer-te leh Sub-Committee member ten Workshop vawi-40 lai neiin Bilingual textbook hi buatsaih a ni a. Tunah hian Pawl 10 Mathematics leh Science Mizo version chu Mizoram School tina hman theih turin peih alo ni ta a ni.

Mizo version bik chauh chhuah lailawk a nih chhan chu HSLC Examination, 2023 atan a zirlaiten an hman tangkai hman ngei duhsakna avanga tih a ni a. Academic Session thar atang chuan bilingual textbook hi Secondary Stage-ah hman theih ngei turin hmalak mek a ni. MBSE hi India ramah Board of Secondary Education, Andhra Pradesh tih loh ah chuan a bawhzui hmasa pawl leh tihlawhtling hmasa ber an ni.