Bangladesh atanga Mizoram-a raltlan lo lut Bangladesh-a thawnkir leh an dem thu an sawi

Central YMA Pisa-a nimin-a Central YMA hruaitute leh sawrkar mi pawimawhte thukhawm chuan Bangladesh atanga Mizoram a raltlan lo lut tawhte BSF-in an thawnkir chu an dem thu an sawi.

Nimin-a Central YMA Pisa-a thutkhawm ah hian Central YMA OB-te bakah Law Minister T.J. Lalnuntluanga; Govt. Deputy Chief Whip Lalrintluanga Sailo leh MLA hlui D. Thangliana te an tel a. Central YMA General Secretary Prof. Lalnuntluanga’n a sawi danin an sahimna duha Mizoram chhunga rawn lut tawh raltlante BSF-in an thawnkir leh chu an hriatthiam loh thu sawiin, Delhi-a cham mek Chief Minister Zoramthanga pawhin hemi chungchang hi sawrkar laipui thuneitute hnenah thlen ngei se an duh thu an sawi a. Lawngtlai District thuneitute leh tlawmngai pawl hrang hrangte’n a theih ang angin raltlante hi tanpui nise an ti bawk.

United Bawm, Pang, Lau Association (UBPLA) President JH. Pianga pawhin Inrinni khan Lunglei Press Club-ah thuthar thehdarhtute kawmin Bangladesh raltlan harsa taka Mizoram lo lutte BSF ten tharum hmanga an nawrlet chu an dem takzet tih a sawi a. Bangladesh atanga Zohnahthlak hrang hrang himna zawnga Mizorama lo lutte chu Mizoram buai avanga Bangladesh a chhuk leh India khua leh tui ni sa an ni tih sawiin, BSF ten danna chhan tur an nei lo tih a sawi a, Mizoram Sawrkar leh mipuite pawhin an unau te an ni tih hriain tha taka lo chhawmdawl turin an ngen sak tih a sawi bawk. UBPLA President chuan Mizo hnahthlak hnam hrang hrang 6 te chuan Bangladesh-ah State hran an ngiat tih sawiin, hei hi a chhan chu kawng hrang hranga enhran an nih vang leh ei leh in tur pawh an duhzat lei phalsak ni lovin thil hralh pawh khap sak an ni a, sawrkar hna sang engmah an thawh phalsak an ni lo tih a sawi a. Mizoram-a raltlan te dinhmun chu Mizoram leh India Sawrkar pawhin enfiah se a duh tih sawiin, raltlan te chu CADC huam chhung Uiphumtlang-ah dahkhawm ni se tiin an ngen sak bawk. Bangladesh atanga raltlan hi mi 293 an awm mek niin chhinchhiah a ni a. Tunhnaia mi 11 rawn luh belh, Mizoram chhunga awm tawh sa leh tun thla bula lo lut nunau 117 te chu BSF te hian an thawnkir nia sawi a ni.

Comments

Popular posts from this blog