Zokhawsang AR Hqrs. hawn hun tur la tifel lo

Aizawl khawpui laili atanga Assam Rifles insawn chhuahna tur, Zokhawsanga Assam Rifles Headquarters hawn hun tur chu tihfel a la ni lo a; hetihlai hian ruahmanna hmasa sawn a nih hnuah ramri chungchanga Assam sawrkar nena inbiakna neih hun tur Mizoram sawrkarin rawtna a neih chu Assam lamin programme pawimawh dang an neih vangin a remchang thei rih dawn lo nia thudawn a ni.

Mizoram sawrkara Home Commissioner H. Lalengmawia, IAS hnen atanga Zalen thudawn danin, Zokhawsang-a Assam Rifles Headquarters hawn hun tur tihfel a la ni lo a, hemi chungchangah hian Cchief Secretary kaihhruaina in Organising Committee din a ni a, Committee chu November 9, 2022 chawhnu dar 1:00-ah thukhawmin Pre-Discussion an nei ang.

September 24, 2022 (Inrinni)-a CMO Conference Hall-a thuthar thehdarhtute a kawmnaah Chief Minister Zoramthanga chuan Union Home Minister Amit Shah a kawmna ah Zokhawsang-a Assam Rifles Headquarters chu Prime Minister emaw, Union Home Minister emaw ngeiin a hmunah hawng se a duh thu a hrilh tih a sawi a, a hun atan November an ruat thu leh a ni tak erawh an la tihfel loh thu a sawi a. Thuthar thehdarhtute zawhna chhangin Chief Minister chuan AR-te chu Zokhawsang-ah engemaw zat an awm tawh thu a sawi a, Union Mome Minister berin a hawn tawh chuan lut nghal tura ngaih an nih thu leh chutih rualin, thawk leh khata luh nghal vut vut theih a nih loh tur thu a sawi bawk.

Hetihlai hian ramri chungchanga Mizoram leh Assam sawrkar inbiakna Guwahati-a neih hun tura ruat, November ni 2-5 inkar tur chu Mizoram-a India President lokal vanga thulh a nih hnuah Mizoram sawrkar chuan inbiakna neih hun atan November 9-11 a rawt tih Home Commissioner chuan sawiin, he thu ziah lai hian Assam sawrkar atangin Official-a chhanna dawn la ni lo mah se, Assam lamin November 9 leh 10-ah Cabinet meeting an nei dawn a, hemi vang hian inbiakna neih hun tur chu sawi theih mai a la ni rih lo.