Union Minister of State for Finance-in Mamit District tlawhin an dinhmun a zirchiang

Union Minister of State for Finance Dr. Bhagwat Karad chuan nimin khan Mamit tlawhin Aspirational District Mamit chu an dinhmun hria a, zirchiang tur leh Banking facilities mi zawng zawng tana ban phak a nih dan hrilh hre tura tlawh a nih thu a sawi.

Union Minister of State for Finance Dr. Bhagwat Karad hi Mamit Tourist Lodge-ah Mamit bialtu MLA Er. H. Lalzirliana leh District Bawrhsap Lalnunhlua bakah sawrkar mi pawimawh ten lo dawngsawngin Union Minister of State pual hian Mamit Chhim Veng YMA Hall-ah Credit Outreach Programme neih zui nghal a ni a. He hunah hian Uion Minister chuan Aspirational District Mamit chu an dinhmun hria a, zirchiang tur leh Banking facilities mi zawng zawng tana ban phak a nih dan hrilh hre tura tlawh a nih thu sawiin, Mamit District mipuite chu retheihna atanga khaichhuah an nih theih nan Bank kaltlanga hmasawnna awm hrang hrangte chu a chhawrtu an nih theih nan Bank dawr nachang hre tur leh Bank lama thawktute pawh engtiklai pawha an inhawn reng thu a sawi a. “India Prime Minister zahawm tak hmalakna in harsatna hi kan la kal pel dawn a ni,” tiin mirethei leh harsa zawkte'n Loan an lak theihna turin Bialtu MLA nen pawh hmalak a ni ang, a ti a. Kuthnathawktu ten Kisan Credit Card neih tur a nih thu leh he Card hmang hian Loan tha bik a awm thu bakah PMJJBY leh PMSBY hnuaiah Bank Account neite tana Insurance Scheme-te chu ngaihven a, hmang tangkai turin a chah bawk.

Union Minister of State in Mamit a tlawh pual hian Mamit District chhunga Bank SBI, MRB, MCAB leh NABARD kaltlangin nimin khan Beneficiaries 560 hnenah Loan cheng vbc. 8.02 pekchhuah a ni a. heng Loan pekchhuah hi KCC/Kissan-ah mi 50, SHG-ah mi 400, Small Medium Enterprise-ah mi 5, MUDRA-ah 25, PVS Vanidhi-ah 10, Housing Loan 10 leh thildang 60, a vaiin mi 560 te an ni.

Nimin-a he hun hmanna ah hian Arvind Kumar Singh, SBI, GSM chuan inlawmna thu sawiin KVSSLV Prasada Rao, NABARD, GM chuan lawmthu a sawi a. SBI hnuaia Corporate Social Responsibilty (CSR) fund atangin Anganwadi naupang te'n nuam taka nitin Wadi an kal theih nan Anganwadi Centre 15 tan Full HD, Smart TV hlan an ni a. Hei bakah hian kuthnathawktu mi 20 te NA-BARD hmalakna in International Trade Fair, New Delhi-a neih tur chhim tura tirh an nih dawn thu tarlan a ni bawk.

Nimin vek hian Union Minister hian Mamit khawpui chhung hmun hrang hrang District Hospital, Primary School, Anganwadi Centre leh Ration lakna (PDS) Centre-te tlawhin, heng hmuna thawktute hian harsatna an neih hrang hrangte Minister hnena an lo thlen chu a ngaihthlak sak a, a theih anga chinfel sak tum a nih thu a sawi.

Union Minister hi Mamit-ah cham mekin Vawiin hian thuthar thehdarhtute a kawm nghal anga, sawrkar hmalakna thenkhat pawh a tlawh leh dawn bawk a ni.

Comments

Popular News (Last 30 Days)

Vawiin-ah HSSLC Exam result