RD in thingtlang-ah hma-lakna a ngah - RD Minister

Rural Development Minister Lalruatkima chuan Rural Development Department chuan thingtlang tihhmasawnna tura hmalakna an ngah em em tih a sawi.

Rural Development Department Officer ten Department chhunga peng hrang hrangte hnathawh thlirletna hun nimin-a Aijal Club Conference Hall-a an neih a hman-puina ah RD Minister Lalruatkima chuan he thu hi sawiin chhungkaw lian tak, thlawhma hrang hrang nei ang an nih avangin an hnathawh te sawihona hun an neih chu a pawimawh thu a sawi a, “Chak zawka hmalak a nih theih nan a tul anga Scheme hrang hranga thawhho theih dan turte pawh hetianga thutkhawmna kan neih hian a hriatthiam theih thin a, a tangkai thin a ni,” a ti.

RD Minister chuan COVID-19 hripui leng kara RD Department hmalakna chi hrang hrangte chhuanawm a tih thu sawiin “Thingtlang lama kan unaute manganga an awm loh nan kan theih chinah ni 100 inhlawhna tha takin kan kalpui thei a, heng bakah hian RD Department hnuaia hmalakna hrang hrang atangin thingtlang loneitute chhawmdawl hna leh hmasawnna ruhrel hrang hrang kan kalpui thei hi thawktute inpekna a ni,” a ti a. Sawrkarin Agency a neih theih tak loh avangin DRDA ni thin chu DRDO a nih tak thu leh, mi tam tak hnenah eizawnna nghet tam tak an insiamsak thei chu lawmawm a tih thu a sawi bawk.

Hun rei tak atangin RD Block siam a har thu sawiin, tun sawrkarah Tlabung leh Kawrtethawveng RD Block neih thar a ni dawn tih a sawi a, Kawrtethawveng RD Block-ah post creation phalsak a nih thu leh Tlabung atan post creation buaipui mek a nih thu sawiin, thla tharah chuan heng hmunah hian BDO Office hawn theih a nih a beisei thu a sawi bawk.