Quarry chim-ah ruang 8 hmuh a ni tawh

Niminpiah tlai-a Hnahthial District Maudarh khua a lung lakna hmun chim a thi zat chu 12 ni a hriat a ni a, ruang 8 lakchhuah a ni tawh.

Hnahthial District Bawrhsap R. Lalremsiama sawi danin nizan hmasa khan tlaivar in ruang zawn hna hi thawh a ni a, nimin khan chhunzawm leh niin ruang 8 hmuhchhuah tawhte hi – Surjit Roy (26), Cachar, Assam; Madan Das (25) Nadia, West Bengal; Rakesh Biswas (21), Nadia, West Bengal; Mintu Mandal (22), Nadia, West Bengal; Buddhadeb Mondal (25), Nadia, West Bengal; Khemlal Kumar (22), Jharkhand; Omprakash Kumar (18), Jharkhand leh Subrata Raptan (24), North 24 Parganas, West Bengal te an ni a. An ruang hi Hnahthial District Hospital-ah enfiah a nih hnuah Anupam Bricks and Concrete Industries (ABCI) Limited thuneitute’n an khua ah theuh an thawn dawn a, nizan khan ruang hi thawnchhuah nghal a ni. He vanduaina thlenga ruang lakchhuah hmasak ber hi nizan hmasa dar 9:40-ah lakchhuah niin ruang dang la awm nia hriat te hi zawn chhunzawm zel a ni a. ABCI Infrastructures Pvt. Ltd. chuan cheng nuai khat theuhin a ral dawn niin K. Lalremruata, LO ABCI Infrastructures Pvt. Ltd. chuan a sawi.

Tun thlenga ruang la hai chhuah loh ni a hriatte hi Ajoy Chakma (25), Khojaisuri, Lunglei District; Shofiqul Islam (26), Goalpara, Assam; Jahidur Islam (27) Barpeta Assam leh Kahamrai (49), Zawlpui, Lunglei District te an ni a. Ruang zawn hna hi ABCI Company hnathawk te leh an khawlte bakah Leite leh khaw thenawm amite, NDRF Aizawl, BSF Lunglei Melte, 2nd Batallion MAP Lunglei, Assam Rifles ten an pui a, Sawrkar hotute pawhin helai hmun hi thutchilhin YMA Leite Branch chuan he vanduaina thlenga thi te hi Kuang an siam sak bawk a ni.

He thil thleng chungchang hi Disaster Management & Rehabilitation Department chuan nimin khan Mizoram sawrkarah report a thehlut a. He chhiatna rapthlak hi November ni 14, 2022 chawhnu dar 2:40-a thleng niin Lung lakna quarry hi ABCI Infrastructure Pvt. Ltd. ta a ni. Report thehluh a nih thleng hian Duty Roster atanga a lan danin quarry chimin a chhilh zat hi mi 12 an ni a, leiminin a chhilh mi 4 te hi ABCI company hnuaia thawk an ni a, mi 8 hi ABCI Sub-Contractor hnuaia inhlawh an ni thung. He chhiatna rapthlak tak thleng hi Mizoram sawrkar chuan pawi a ti tak meuh a, ruang zawn hna hi thawh mek niin hmuh kim an nih hma chu kalpui tur a ni a. Ruang zawn hna thawktu mi tlawmngaite hman turin DM&R Minister Lalchamliana chuan Rs. 20,000/- a pe a ni.