Mizoram Firearms Bureau in Mizoram Police hnenah ralthuam chi hrang hrang an hlan

Mizoram Firearms Bureau chuan nimin khan Mizoram Police hnenah ralthuam chi hrang hrang 49 zet an hlan.

Heng ralthuam hlanna puala inkhawm GS Arya Mess, PHQ, Aizawl-ah neih chu Home Minister Lalchamliana chuan hmanpuiin Silai man tur awm lo se tih chu duhthusam a nih laiin mimal emaw, midangin silai kawl thiang lo an kawl emaw, sawrkar hnenah hlan emaw an awm hi hnathawktute hmalakna leh inpekna a ni tih a hriat thu leh heng ralthuam Silai, Silaimu leh Granade Mizoram Firearms Bureau in Mizoram Police hnena a hlan tur hi Police ten tangkai taka an hman a beisei thu a sawi a, mipui himna chu Mizoram Police te ngaih pawimawh ber a nih thu a sawi bawk. Home Minister chuan heng Silai leh a mu te hi Judiciary in uluk taka an ngaihtuah tawh hnuah an Case tifelin Mizoram Firearms Bureau-ah an hlan a ni tih sawiin, tunhma chuan Civil mi te pawn an kawl theih silai a awm thin a, tun hnuah erawh chuan dan lo anga mi in silai kawl an lo awm chuan Mizoram Firearms Bureau in hmalain, fel fai takin a tiral tawh thin dawn tih a sawi bawk.

Home Minister Mizoram Police te hian a theih chin chinah ralthuam tha ber ber, tunlai ber ber nei se tih chu sawrkar duhthusam a ni tih pawh sawiin, amaherawhchu sum leh pai lamah duh khawp kan neih thin loh avangin duhthusam ang zanin ralthuam kan lei thei thin lo tih a sawi a, “Chuti chung chung chuan ralthuam thar ber ber te sawrkarin a lei ve reng a, kan Police te ralthuam neih hi a zahpuiawm loh hle a ni,” a ti bawk. Hei bakah hian Police mi 304 Compassionate Ground a lak turin tha thara buaipui a nih thu pawh sawiin, hei hian kum 2019 hunlai daih a verification leh re-verification tih tawh chauh a huam tih a sawi a, a hnulam a mi chu ngaihtuahna ah a tel theih rih loh thu a sawi bawk.

Mizoram Firearms Bureau hi February ni 10, 2021-a din niin Mizoram Police hnenah hian ralthuam hrang hrang AK Type 56 Rifle, AK Type 81 Rifle, M4 A1 Carbine, MA3 MK-II Rifle, MA3 MK-II Rifle bakah a dangte hlan a ni a. A vaia ralthuam hlan hi 49 a ni. Ralthuam hlanna Certificate-ah hian Mizoram Firearms Bureau & Commissioner & Secretary hming leh DGP Mizoram te hming a chuang a ni.