Hunpui lo thleng turah Serchhip-a halpuah leh halmawi hal lohna VC Area te lawmman hlan tum a ni

Kumin 2022 Krismas leh kum 2023 kumthar vuakvet-a Serchhip District-a Dan leh thupek kenkawh dan tur chungchang sawihona nimin khan Serchhip-ah neih a ni a, Halpuah leh halmawi hal, hman leh zawrh khapna zawma Serchhip Town chhunga halpuah leh halmawi hal lohna VC area thlanga lawmman pek nise tih a ni.

Boruak muanawm tak hnuaia heng Hunpui te mipui ten an hman theih dan tur sawihona Serchhip DC Meeting Room-a neih hi Bawrhsap mawhphurhna la mektu Addl. DC Lalmuansanga Ralte chuan kaihruaiin kan hmaah Krismas leh Kumthar lawmna lo thleng mai tura beisei a nih thu leh kum danga sawrkarin khuahkhirhna a lo siam tawh thin Halpuah, Halmawi leh Silai lem lam chite lakluh, hman leh kawl khap te bakah ruihhlo te, rukruk leh sualna dang dangah uluk taka inven a tul leh dawn tih a sawi a. Heng sawrkar phal loh thilte khuahkhirhna kan inhrilhhriat tlan hma a, hma kan lak ran a tul avang leh sumdawngte pawhin phal loh thilte zawrh tuma hma an lo lak loh nan hma takah thutkhawm hi koh a nih thu a sawi a. Sawrkarin khapna a siam chu District Administration chuan khauh takin an kenkawh a ngai dawn tih sawiin, “Dan bawhchhia kan man te chu a tawp thlengin kan umzui dawn bawk a ni,” a ti a. He huna tel Kohhran aiawhte, Tlawmngai Pawl leh sumdawng pawl aiawh bakah chanchinbumiten mipuite hnena min lo thehdarh sak uar tur pawhin a ngen nghal bawk a ni.


He hunah hian Serchhip Addl. SP Saidingliana Sailo chuan kumtin sawrkar in khapna a siam te bawhzuia hma an lo lak tawh thin thu sawiin, kumin ah pawh Magistrate in thupek a chhuah chuan hetiang sawrkar khap thil manchhuah a nih theih nan theihtawp an chhuah tur thu a sawi a. Heng khapna bawhzui hian Dawrkai te enfiah a nih thin bakah Check Gate-ah te pawh hetiang lo lalut an awm leh awm loh enfiah hna an lo thawh tawh thin thu a sawi bawk.

Serchhip-a sumdawng pawl, Chamber of Commerce-a Secretary F. Lalthlamuana chuan sawrkar in halpuah leh halmawi hrang hrang a khap thin te lalut lo tur leh zuar lo tura an member te ziak leh tawngka a an in ngen thin thu sawiin, an zawm tha viau thin nia an hriat thu a sawi a. Sawrkar khapna zawm lo thin te chu a tlangpuiin sumdawng pangngai ni lo, hunpui vuakvet-a thil zuar thin te an nih thu a sawi bawk.


He thutkhawm a tel te hian mipui ten Krismas leh Kumthar vuakvet te hlim leh thla-muang taka an hman theih nan a tul ang zela sawrkar in thupek a siam te kenkawh nise tiin Serchhip Bawrhsap-in a rang lamin heng halpuah leh halmawi bakah midang tana harsatna thlen thei leh vanduaina thlen palh thei te khapna thupek tihchhuah ngaite tichhuak se an ti a, a kenkawh hna pawh kum danga an lo tih thin angin Police te thawhpuia inlungrual taka bawhzui tlan ni se an ti.

Khapna thupek tihchhuah bakah hian Bawrhsap in Kohhran hrang hrangte, tlawmngai pawl leh VC tin te hnenah ngenna lehkha pechhuak se tiin Serchhip Chamber of Commerce Member ni chiah lo sumdawng dang te hnenah pawh a zau thei ang bera puanzar ni se tiin Bazar-a thil zawrhna chungchang pawh enfiah nise an ti.

Krismas leh Kumthar vuakvet-a Halpuah leh Halmawi khapna zawm thaa heng halpuah leh halmawi khapna zawm tha Serchhip Town chhunga Village Council Area pawh Serchhip Sub-Hqrs. YMA ten lo chhinchhiahin DC Office atangin lawmman pek nise an ti a. YMA Sub-Hqrs. Serchhip hruaitute pawhin an Branch Area hrang hranga venhim hna an thawh thin dan te he hunah hian an tarlang bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar