Mizoram tlawhtu President in Mizoram Legislative Assembly Special Session-ah thu a sawi

Zan khat riaka Mizoram-a rawn zin India President Droupadi Murmu chuan nimin khan 8th Mizoram Legislative Assembly Special Session-ah thu sawiin, ram nuam tak Mizoram-ah President a nih hnua a vawikhatna atan a lo kal thei chu lawmawm a tih thu a sawi.

Nimin-a Mizoram Assembly Hosue-a thu a sawina ah hian President Droupadi Murmu-i chuan he thu hi sawiin, amah an lo lawm danah lawmthu a sawi bawk a. Mizoram Legislative Assembly-in kumin May thla a Golden Jubilee an thleng thei chu lawmpuiin; mipuite duh dan au chhuahpuia mipuite aiawhtu tha tak leh Dan an siamna kawnga mi tam zawk hmakhua ngai thintu Member ni tawh leh ni mekte chu an fakawm thu a sawi a. India-in zalenna a hmuh kum 75-na hian hun kal tawh nena inzawm tlat kan nih zia a tarlang tih sawiin, he hunah hian Hnam pasalthate inpumpekna chuan mitin huapzo hmasawnna thlen turin mitin hnenah chona thar pe se a duh thu a sawi a ni.

Mizoram leilungin engemaw chenah harsatna a thlen chungin tehna hrang hrangah hma a sawn zel thu President chuan sawiin, Ayushman Bharat, mitin tana Health Coverage chu Mizo mipuiten an chhawr takzet thu a sawi a. Mizoram tana harsatna lian ber chu inkalpawhna a nih thu sawiin, chumi sutkian chuan zirna leh hriselna kawnga hmasawnna mai bakah mipuite eizawnna a tih awlsam dawn avangin ngaihpawimawh a nih thu a sawi a. Mipuite nun ti awlsam turin hmalakna hrang hrang kalpui mek a nih thu leh Digital India hnuaiah Mizoram chuan Central leh State sawrkarte hmalakna te chu a chhawr zel tur thu a sawi bawk. Mizoram mai bakah North East state dangte hmasawnna chu ramin bung thar a kai zelna tan a pawimawh thu President chuan sawi bawkin, Asia chhimchhak leh Asia Pacific ramte nena inpawhna tha neih anih theih nan hmarchhak State te chu Act East Policy hnuaiah ngaihpawimawh an nih thu a sawi a, Mizoram chuan India-in a thenawm ramte nena inpawhna tha zawk neih a tumna kawnga tha thawhtu leh chhawrtu anih a beisei thu a sawi bawk a ni.

Nimin-a Mizoram Legislative Assembly Special Session-ah hian Speaker Lalrinliana Sailo chuan President Droupadi Murmu chu lawmin, India ram President 15-na leh Tribal zinga President hmasa ber ni tura thlantlin ani chu a lawmpui thu a sawi a. Governor Dr. Hari Babu Kambhampati pawhin President chu lawmin, thlantlin a nih hnu reilote chhunga Mizoram a lo tlawh chu lawmawm a tih thu a sawi a. Mizoram chu State muanawm tak a nih thu leh Hnam hrang hrangte lungrual taka an awmna hmun a nih thu sawiin, MLA-te nungchang pawh entawntlak tak a nih thu a sawi bawk. President lo kal chuan MLA te chona thar pein an hna tha lehzuala thawk turin a puih ngei a rin thu leh a bikin hmeichhia te fuihtu tha tak a nih bakah taihmakna leh tumruhna nen chuan engkim a hlawhchhuah theih a ni tih a hriattir a beisei a. President lo kal chu lawmawm a tih thu leh nidangah pawh lo kal nawn leh turin a sawm a ni.

Special Session hun khara lawmthu sawitu Chief Minister Zoramthanga chuan President-in House-ah thu a sawi avangin lawmthu a hrilh a. Tribal hmeichhia President atana thlangtu sawrkar laipui chu fakawm a tih thu a sawi bawk. Kum 1986-a remna thuthlung ziah chuan Mizoram chu India rama State ralmuang berah a siam thu sawiin, Mizoram chu hausa lo mahse remna leh muanna a neih chu thawnchhuah tlak khawpa ramdang te awh ber a nih thu a sawi.

President hian Special Session-a thu a sawi zawh hnu chawhma dar 11:50 khan Mizoram chhuahsanin Sikkim a pan leh a ni.