Football Tournament 1st Round khel zo dawn

Serchhip Sports Complex-a Inter-Branch YMA Football Tournament khelh mek ah nimin khan match thum khelh niin Vawiin hian 1st Round khelh zawh a ni ang.

Serchhip Sub-Hqrs. YMA buatsaih Inter-Branch YMA Football Tournament khelh mekah hian nimin-a inkhel hmasa berah Thenzawl Bazar Branch chuan Chhingchhip Venglai Branch 2-1 in an hneh a, Thenzawl Bazar Branch tan Lalhriatzuala leh Lalawmpuia te chuan goal khungin Chhingchhip Venglai goal awmchhun hi hun tawp dawna Kevin Lallianmawia khung a ni.

Inkhel vawi hnihna ah Serchhip Kawnpui North Branch ten Serchhip Darnam Branch chu 5-2 in an hneh a, S. Kawnpui North Branch tan C. Lalsawmkima chuan goal hnih khungin Vanlalliana, Lalhunthara leh Vanlalduata ten goal khat theuh an khung a, Darnam Branch tan Lalfakawma leh Zodinmawia te chuan goal khat ve ve an khung a ni.

Nimin-a inkhel hnuhnung berah Serchhip Hmar Veng Branch ten Thenzawl Kanan Branch chu 7-1 in an hneh bawk a, Hmar Veng Branch tan Vanlalruatkima Ralte chuan hattrick siamin goal thum a khung a, Lalpekhlua chuan goal hnih a khung bakah Lalchhuanmawia leh Lalrinchhana ten goal khat ve ve an khung a, Thenzawl Kanan Branch tan PC. Zorinsanga chuan goal khat a khung ve bawk.

Vawiin hian inkhel pathum awm leh tura ruahman niin heti hian 1st Round khelh zawh a ni dawn a ni.

Vawiin-a inkhel turte :

S. Field Veng Branch Vs Hmunzawl Branch (10:00)

S. Dinthar Branch Vs Keitum Branch (12:00)

Thenzawl Branch-I Vs Neihloh Branch (2:00)