Serchhip District-ah SEDP sem zo thawkhat; Tanpuina dawngtute hmalakna enfiah a ni ang

Serchhip District-a Family Oriented SEDP hnuaia tanpuina dawng turte hnenah an sum dawn tur thawhkhatna chu sem zawh thawkhat a ni ta a, SEDP hnuaia tanpuina dawngtute'n an Trade thlanah hma an la ngei em tih enfiah a ni ang.

Serchhip District-a Family Oriented SEDP kalpuitu Department hrang hrangte chuan an Department hnuaia tanpuina dawng tura thlan te hnenah hian tanpuina an dawn tura a thawh khatna (1st Instalment) chu Bank Account kaltlang in an pechhuak kim thawkhat tawh tih an sawi a, sawrkar in ruahmanna a siam ang chuan SEDP hi First Instalment Rs. 25,000 hi October 31, 2022 ralhma semchhuah fel tur niin Second instalment Rs. 25,000 dang pawh kumin December thla atanga February 15, 2023 chhungin pek fel tur a ni dawn a, hei hi a tul anga tih danglam theih a ni thung a ni.

Planning & Programme Implementation Department-in Notification a tihchhuahah chuan SEDP tanpuina dawng tura thlan ten 1st Instalment pek an nih hnuah an Trade thlanah hma an la tur niin a hmanna tur dik takah an hman ngei theih nan District tinah District Level SEDP Committee kaihhruaiin Village Level Committee-te nen endik tur a ni a. 2nd Instalment pek zawhah tanpuina dawngtu ten an pawisa dawn an hman that leh that loh District Level SEDP Committee kaihhruaiin District-a Department Office-te'n endik tur a ni bawk a; Village/Local Committee-ten a tul angin an pui anga. Department Inspection report chu SEDP Executive Board-ah thehluh tur a ni ang.

Pawisa dawn hmang tha lo emaw, a hmanna tura hmang lo Inspection Report-a târlante chu Family Oriented SEDP awm zel turah telh an ni tawh dawn lo a. Department-te'n District SEDP Committee leh Village/Local Committee-te hriatpuina in hna thawk tha bik chhungkaw panga (5) thleng an thlang thei a, chung mite chu SEDP Governing Body remtihpuina in chawimawina leh lawmman pek theih an ni thung ang.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man