Serchhip District-ah Polling Station 3 siam belhin Polling Station 88 awm tawh tura ruahman a ni

Serchhip District chhung Assembly bial 3-a Polling Station thenkhat chu siamrem a nih dawn bakah Polling Station thar pathum (3) siam belh tura ruahman a ni a, hemi ang hian Serchhip District chhungah Polling Station 88 a awm tawh dawn a ni. 

Nimin khan Rationalisation of Polling Stations, 2022 chungchang ngaihtuahin District Level Standing Committee thutkhawm chu Serchhip DC Meeting Hall-ah Deputy District Election Officer Lalmuansanga Ralte kaihhruaiin neih a ni a, he hunah hian Deputy DEO chuan inthlang ram kan nih avangin mipuite tana tha tur leh awlsam zawkna tur chu ngaihtuah reng a nih thu leh Official te tan pawh inthlan kaihhnawih buaipui awlsamna tur chu ngaihtuah ve reng a nih thu sawiin, tun tumah pawh hian Vote nei ten awlsam zawka Vote thlak tura Polling Station an pan theihna turin ruahmanna hrang hrang chhawpchhuah a nih thu a sawi a. Heng te hi Political Party hrang hrang ten an pawm thei a nih chuan Election Commission of India-ah thlenin hemi ang hian tih danglam a nih dawn thu a sawi a. Heng an chhawpchhuah hrang hrangte hi he huna tel Political Party te chuan an pawm thu an sawi angin Election Commission-ah thlen nghal a ni dawn a ni.


He hunah hian Serchhip Election Officer Lalrinchhani Ralte chuan nakum hi Mizoram inthlanpui neih kum a nih leh tawh avangin Election Branch chuan inbuatsaihna an kalpui leh tan tawh thu a sawi a, chumi kal zelah chuan Election Commission duhdan angin Polling Stations chinfel ngaite chinfel hna pawh thawkin, Serchhip District chhunga Polling Station hrang hrangte an tlawhchhuah hnuah Polling Station 9 te chu siamrem ngaia ngaih a nih thu leh a siamrem dan tur pawh a hmunah enfiah vek a nih tawh thu sawiin, heng te hi thlirho a ni.

Tun tuma Polling Station siamrem tura pawm tak te hi 26-Serchhip (ST) A/C-ah Ser-chhip-I Polling Station atana Govt. Darnam Primary School hman thin chu LM Middle School ah thlak tur a ni dawn a, hei hi School pahnihte an lo inchhunfin tawh vang a ni. Electoral Roll-a Serchhip-IX huamchhunga voters te hming inziahna Section pahnih chauh awm thin chu Section pathum-a siam tur niin, Leisang Veng, AOC Veng leh Venglai, Bazar Veng tih te in ziahkai an ni tawh ang.

27-Tuikum (ST) A/C-ah Darlawng Polling Station atana Govt. Primary School hman thin chu Govt. Middle School-ah sawn a ni dawn a. Tlungvel khuaa Polling Station pahnih awm thin pawh Voters an lo pun belh zel avangin Polling Station pakhat siam belhin pathum-ah tihpun a ni anga, Tlungvel-I Polling Station chu Govt. Tlungvel M/S-I , Tlungvel-II Polling Station thar chu Govt. Tlungvel P/S-II leh Tlungvel-III Polling Station chu Govt. Tlungvel P/S-III a ni ang. Baktawng khua ah Polling Station pakhat siam belh tur a ni dawn bawk a, Baktawng-I Polling Station atan Govt. Baktawng P/S-II leh Baktawng-II Polling Station atan Govt. Baktawng M/S -II te a ni dawn a ni.

28-Hrangturzo (ST) A/C-ah Keitum-I Polling Station Govt. Keitum P/S-III chu NH. 54 laihzauh vanga sawn niin Govt. Keitum P/S- I an sawn an rel a. Mualcheng-a Polling Station pakhat awm thin chu pakhat siam belin Mualcheng-I Polling Station atan Govt. Mualcheng P/S-I leh Mualcheng-II Polling Station atan Govt. Mualcheng M/S te a ni anga. Lungkawlh Polling Station ni thin Govt. Primary School chu Govt. Lungkawlh Middle School-ah sawn an rel bawk.

Hetianga Polling Station siam belh a nih avang hian Serchhip Bial-ah Polling Station 29, Tuikum Bial-ah 32 leh Hrangturzo Bial-ah 27, a vaiin Polling Station 88 leh BLO 88 an awm tawh dawn a ni.

Comments

Popular posts from this blog

Tukverh-a tlasual boral