North Vanlaiphai-a Supply Kudam sak thar hman theih turin Home Minister in a hawng

Hrangturzo bialtu MLA leh Home Minister Lalchamliana chuan nimin khan a bial chhung North Vanlaiphai khua ah Subsidiary Distribution Center (SDC) Godown thar a hawng a, Godown, Staff Quarters leh Toilet Block sak thar te a fang nghal bawk.
North Vanlaiphai SDC Godown hawnna hunah hian Home Minister Lalchamliana chuan Mizoram mipuiten man tlawm zawka buhfai ei tur an lak theihna atana Supply Department te inpekna leh an hnathawhte fakawm a tih thu a sawiin, hun harsa ah pawh kawng pangngai bakah Manipur leh Tripura kaltlang leh Myanmar leh Bangladesh thlenga kawng an dap thin te chu fakawm a tih thu a sawi a. FCI atanga State quota buhfai kan kham loh avangin Open Market atanga man to zawka buhfai lei a ngaih thin thu sawiin, chungte pawh chu a man tlawmin mipuite hnenah a pe zel tih a sawi a, buhfai man tihpun tumna te awm thin mah se Sawrkar chuan mipuite dinhmun ngaihtuahin buhfai man a la ti sang rih lo tih a sawi bawk.

Home Minister chuan buhfai mai bakah eirawngbawlna Gas (LPG), Petrol leh Diesel te pawh mipuiin an nghei loh nan Sawrkarin theihtawpin hma a la thin tih sawiin, Supply Department pawhin an hahpui hle thin thu a sawi a, “An thawhrimna zarah mipuite nghei lovin thlamuang takin kan awm thung a ni,” a ti a. Godown thar chu tangkai taka North Vanlaiphai leh a chhehvel khua ten hmang tura duhsakna hlanin, a venhim leh uluk a ngaihna kawngah te thahnem ngai turin North Vanlaiphai khawtlang mipuite a chah bawk a ni.

North Vanlaiphai SDC Godown hawnna hi FCS&CA Department changtu Secretary Ramdinliani chuan a kaihruai a, he Godown sakna sum hi NABARD hnuaiah Construction of Intermediate Storage Godown & Related Infrastructures Project atanga Mizoram sawrkar in cheng vbc. 39.61 a hmuh niin he sum hmanga Godown 21 zingah he Godown hi a tel a. North Vanlaiphai Godown bik atan hian cheng nuai 183.92 hman niin Godown bakah Staff Quarters te, Toilet Block te sak tel a ni. Babie Construction & Consultancy Services chuan he Godown sak hna hi thawkin nimin-a hawnna neih a nih rual hian FCS&CA Department kutah hlan nghal a ni a, Department aiawhin FCS&CA Department Director Dr. Andrew H. Vanlaldika chua document te a dawng nghal a ni.